ಮೂರ್ಜಗದೊಡೆಯ ವಿರಾಜಿಸಿ ಕುಳಿತಿಹನು ankita ramesha

 ..

ಮೂರ್ಜಗದೊಡೆಯ ವಿರಾಜಿಸಿ ಕುಳಿತಿಹನು

ರಾಜ ರಾಜರ ಗಂಡ ರಾಜಗೋಪಾಲ ಪ.

ಚಿತ್ತಜನೈಯನು ಮುತ್ತಿನ ಗದ್ದುಗೆ ಮೇಲೆ

ಅರ್ಥಿಲೆ ಏರಿ ಕುಳಿತ ಮತ್ತೆ ಗೋಪಾಲ 1

ಇಂದಿರೇಶನು ಬಹು ಚಂದಾಗಿ ಕುಳಿತಿಹನು

ಬಂದ ಜನರ ಸಹಿತ ತಂದೆ ಗೋಪಾಲ 2

ಸರ್ಪಶಯನನ ಬದಿಯಲೊಪ್ಪುವ ಬಲರಾಮ

ವಿಪ್ರರಿಂದಲೆ ಕುಳಿತ ಅಪ್ಪ ಗೋಪಾಲ3

ಥಳ ಥಳ ಹೊಳೆಯುತ ಅಳಕಿಸಿ ಸೂರ್ಯನ

ಬೆಳಕು ತುಂಬಿಸಿ ತಾನು ಕುಳಿತ ಗೋಪಾಲ 4

ಮುತ್ತು ಮಾಣಿಕ ನವರತ್ನ ಸಿಂಹಾಸನ

ಅರ್ಥಿಲೆ ಏರಿ ಕುಳಿತ ಮತ್ತೆ ಗೋಪಾಲ5

ನೃತ್ಯ ವಾದ್ಯಗಳಿಂದ ನರ್ತನ ಮಾಡಿಸಿ ಕುಳಿತ

ಕೀರ್ತಿವಂತನು ದಿವ್ಯ ಮೂರ್ತಿ ಗೋಪಾಲ 6

ಬಂದ ಜನಕೆ ಆನಂದವ ಪಡಿಸುತ 

ಚಂದ್ರನಂತಲೆ ಕುಳಿತ ಬಂದು ರಾಮೇಶ 7

****