ಎಂಥ ಶೂರನೊ ರಾಮ ಎಂಥ ಧೀರನೊ ankita rangesha vittala

ಎಂಥ ಶೂರನೊ ರಾಮ ಎಂಥ ಧೀರನೊ ll ಪ ll

ಕಂತುಹರನ ಧನುವನೆತ್ತಿ

ಪಂಥದಿಂದ ಮುರಿದು ಬಿಸುಟ ll ಅ ಪ ll

ಹಲವು ಶೂರರಾಜರದನು

ಚಲಿಸಲಾಗದ ಧನುವ

ಸುಲಭದಿಂದಲೆತ್ತಿ ಮುರಿದು

ಲಲನೆ ಸೀತೆಯೊಲಿಸಿದವನು ll 1 ll

ಸಕಲ ಕ್ಷತ್ರಿಯರನು ಗೆಲಿದು

ಪ್ರಕಟನಾದ ಪರಶುರಾಮ

ಶಕುತಿಯನ್ನು ತಾನು ಪರಮ

ಯುಕುತಿಯಿಂದ ಗೆಲಿದು ಬಂದ ll 2 ll

ಸಾಲು ಶಿರನ ಕೀಟವೆಂದು 

ಬಾಲದಲ್ಲಿ ತಂದ ವೀರ

ವಾಲಿಯನೇಕ ಬಾಣದಲಿ 

ಲೀಲೆಯಿಂದಲಿರಿದ ಜಾಣ ll 3 ll

ಹತ್ತುನಾಲ್ಕು ಲೋಕಗಳನು 

ಸುತ್ತಿಗೆಲಿದು ಖ್ಯಾತನಾದ

ಹತ್ತು ತಲೆಯ ದುಷ್ಟನನ್ನು

ಕತ್ತು ಕಡಿದು ಕೆಡಹಿದವನು ll 4 ll

ರಾಸಿ ದೈತ್ಯರನ್ನು ಕೊಂದು

ದೇಶವನ್ನು ಉದ್ಧರಿಸಿದ

ವಾಸವಾದಿ ಸುರನುತ ರಂ-

ಗೇಶವಿಟ್ಠಲರೇಯನವನು ll 5 ll

***