ಹದಿನಾಲ್ಕು ಲೋಕದಲಿ vijaya vittala ankita suladi ಅಳಿಗಿರಿವಾಸ ಮಹಾತ್ಮೆ ಸುಳಾದಿ HADINALKU LOKADALI ALAGIRIVASA MAHATME SULADI

ರಾಗ ಚಾರುಕೇಶಿ 

Audio by Vidwan Sumukh Moudgalya

ಶ್ರೀ ವಿಜಯದಾಸಾರ್ಯ ವಿರಚಿತ 
 ಅಳಿಗಿರಿವಾಸನ ದೇವರ ಚರಣ ಮಹಾತ್ಮೆ ಸುಳಾದಿ 

 ಧ್ರುವತಾಳ 

ಹದಿನಾಲ್ಕು ಲೋಕದಲಿ ಪೂಜೆಗೊಂಬ ಚರಣ 
ಸುಧಾಕರ ನಂದದಲಿ ಪೊಳೆವ ಸುಂದರ ಚರಣ 
ಪದೊ ಪದಿಗೆ ನಾರದನ ವದನದಿ ನೆನೆವ ಚರಣ 
ಮೃದುವಾದ ದಿವ್ಯ ಚರಣ 
ಕದನದಲಿ ನರನ ರಥ ಮುಂಬಿನಲ್ಲಿದ್ದ ಚರಣ 
ಅಧೋ ಭುವನಕಾಶ್ರಯವಾಗಿದ್ದ ಚರಣ 
ನಿದುರಶನವಾಗಿ ನಿತ್ಯ ತೋರುವ ಚರಣ 
ಸದಮಲವಾದ ಚರಣ 
ಚದುರ ಅಳಗಿರಿ ತಿಮ್ಮಾ ವಿಜಯವಿಠಲ ಸಾರ -
ಹೃದಯರಿಗೆ ವೊಲಿದು ಸಂಪದವಿ ಕೊಡುವ ಚರಣ ॥ 1 ॥

 ಮಟ್ಟತಾಳ 

ಸನಕಸನಂದರ ಮನಕೆ ಪೊಳೆವ ಚರಣ 
ದನುಜಕುಲ ಸಂಹರಣ ಮಾಡುವ ಚರಣ 
ಕನಕಮಯವಾಗಿ ಪೋಲುವ ಸಿರಿ ಚರಣ 
ಘನ ವೃಷಭಾದ್ರಿಯಲಿನಿಂದ ವಿಜಯವಿಠಲ 
ಅನುಗಾಲ ಎನ್ನ ಸಾಕುವ ಶುಭಚರಣ ॥ 2 ॥

 ತ್ರಿವಿಡಿತಾಳ 

ಗಗನ ಪಾತಾಳ ಭೂ ವ್ಯಾಪಿಸಿದ ಚರಣ 
ಅಗಣಿತ ಗುಣದಿಂದವೊಪ್ಪುವ ನಿಜಚರಣ 
ಮೃಗಮದಾದಿ ಯಲ್ಲಿ ಪೂಜೆಗೊಂಬುವ ಚರಣ 
ಅಘಪರ್ವತಕ್ಕೆ ಅಶನಿಯೆನಿಸುವ ಚರಣ 
ಜಗದೇವ ಅಳಗಿರಿ ತಿಮ್ಮ ವೃಷಭಾದ್ರಿ 
ನಗರಾವಾಸ ವಿಜಯವಿಠಲ ದೇವನ ಚರಣ ॥ 3 ॥

 ಅಟ್ಟತಾಳ 

ಎಂಥವರನ್ನ ಚಂಚಲಗೊಳಿಸುವ ಚರಣ 
ಸಂತರಿಗೊಲಿದು ಮೇಲೆ ಬಿಡದ ಚರಣ 
ಅಂತಕನಾಳಿಗೆ ಶೂಲವಾದ ಚರಣ 
ಚಿಂತನೆ ಮಾಡಲು ನಿಲಕುವ ಚರಣ 
ಸಂತತ ವೃಷಭಾದ್ರಿ ಅಳಗಿರಿ ತಿರ್ಮಲ 
ಶಾಂತ ವಿಜಯವಿಠಲನ್ನ ಶ್ರೀ ಚರಣ ॥ 4 ॥

 ಆದಿತಾಳ 

ಮುನಿಪ ಮಂಡೂಕಗೆ ವರವಿತ್ತಾದೀ ಚರಣ 
ಜನಪ ಪುಣ್ಯನಿಧಿಗೆ ವೊಲಿದ ಚರಣ 
ಪ್ರಣುತಾರ್ತಿಹರನಾದ ಬಲು ಪಾವನ ಚರಣ 
ಪ್ರಣವ ಪೂರ್ವಕದಿಂದ ಪರಿಪೂರ್ಣವಾದ ಚರಣ 
ಹನುಮವಂದಿತವಾದ ವಜ್ರರೇಖಿಯ ಚರಣ 
ಘನವರ್ನದಂತೆ ನಿತ್ಯರಂಜಿಸುವ ಚರಣ 
ಮಣಿಭೂಷಣವಾದ ವೃಷಭಾದ್ರಿ ಶೈಲವಾಸ 
ಎನಗೊಲಿದ ವಿಜಯವಿಠಲ ತಿಮ್ಮನ ಚರಣ ॥ 5 ॥

 ಜತೆ 

ಪಾಂಡ್ಯರಾಯಗೆ ವೊಲಿದ ಪರಮಪಾವನ ಚರಣ 
ಚಂಡಕೋಟಿತೇಜ ವಿಜಯವಿಠಲನ ಚರಣ ॥
***