ಬಡತನವು ಸಾಕೋ ನಮ್ಮಪ್ಪ ತಿಮ್ಮಪ್ಪ ankita sirikanta vittala

ರಾಗ - ತೋಡಿ

ತಾಳ - ಆದಿತಾಳ

ಬಡತನವು ಸಾಕೋ ನಮ್ಮಪ್ಪ ತಿಮ್ಮಪ್ಪ l ತಿರುಪತಿಯ ತಿಮ್ಮಪ್ಪ ll ಪ ll

ನಡುನೋಯುವ ಪರಿ ತಿರುಗುತ ಬಾಯ್ ಬಾಯ್ ಬಿಡುತ l

ಪರರ ಬಿರುನುಡಿ ಕೇಳುತ ದೈನ್ಯದಿ ಕೊರಗುವ ll ಅ ಪ ll

ತಂಬಿಗೆ ಪಿಡಿಯುತ ಕೈಯ್ಯಲಿ ಅದು l ತುಂಬಲೆನುತ ವದರುತಲೀ ll

ಅಂಬುಜನಾಭನ ಮಹಿಮೆಯ ಪೊಗಳುತ l 

ನಂಬಿದ ಸತಿಸುತರುಗಳನೆ ಜರಿಯುತ l

ಸಂಭ್ರಮದಿರ್ಪರ ಗೃಹಪ್ರವೇಶಿಸುತ l ಸ್ತಂಭದ ಮರೆ ತಲೆಬಾಗಿಸಿ ದೈನ್ಯದಿ ಕಳವಳಿಸುವ ll 1 ll

ಪಂಡಿತ ನಾದೊಡದೇನು ಪ್ರ l 

ಚಂಡ ಬುದ್ಧಿಯಿರಲೇನು l

ಪುಂಡರೀಕಾಕ್ಷನ ಕೃಪೆ ಇಲ್ಲದಲಿರೆ l ಕಂಡಕಂಡವರು ಬೈವುತದಬ್ಬುತ l

ಧಾಂಡಿಗ ನಿನಗೇಂಬಂದಿದೆ ಕೇಡೆಲೊ l 

ಪುಂಡ ದೂರಸಾಗೆನುತಲಿ ಹಾಸ್ಯದ ನುಡಿ ನುಡಿವರು ll 2 ll

ದೇಶದೇಶಗಳ ತಿರುಗಿ ಮನ l 

ದಾಶೆಯಿಂದ ಬಲು ಕೊರಗೀ ll

ಕಾಸುವೀಸದ ದಾಯವ ಕಾಣದೆ l ಬೇಸರಪಡಿಸಿ ಜನರ ಸಮುದಯ ಸಂ l

ತೋಷಸುಖವ ಸ್ವಪ್ನದೊಳರಿಯೆನು ಪರಿ ಪೋಷಿಸಯ್ಯ ಸಕಲೇಷ್ಟಪ್ರದವೋ ಸಿರಿಕಾಂತವಿಟ್ಠಲ ll 3 ll

***