ಅಗಣಿತಾಗಣಿತ ಮಹಿಮ ಜಗದೊಳು others

by ಬಡೇಸಾಹೇಬರು
ಅಗಣಿತಾಗಣಿತ ಮಹಿಮ ಜಗದೊಳು ನಿಮ್ಮ
ಬಗೆ ತಿಳಿಯುವರಾರಮಮ ||ಪ||

ಮಗನ ಮಗನಿಗೆ ಒಲಿದು ಮಗಳ ಧಾರೆಯನೆರೆದಿ
ಮಗಳ ಮಗನ್ವೈರಿಯ ನಿಗಯಿಟ್ಟು ಸಲಹಿದಿ ||ಅ||

ಓಂಕಾರದಾಚೆಗಿರ್ದ ಅಮಲರೂಪ
ಓಂಕಾರದೊಳು ನೆಲೆಸಿದಿ
ಅಂಕುರಿಸಕ್ಷರತ್ರಯಲಂಕಾರದಿಂ ಸೃಷ್ಟಿ-
ಸಂಕಲ್ಪಗೈದು ನಿಷ್ಕಲಂಕನೆಂದೆನಿಸಿದಿ     ||೧||

ಸೃಷ್ಟಿ ಉತ್ಪತ್ತಿಗೈದಿ ಉದರದಿ
ಇಟ್ಟು ರಕ್ಷಕನೆಂದೆನಿಸಿದಿ
ಶಿಕ್ಷಕೆನಿಸಿ ಸರ್ವಸಾಕ್ಷಿ ನೀನೆಯಾಗಿ
ಮೋಕ್ಷ ನೀಡುವ ಮದಧ್ಯಕ್ಷನೆಂದೆನಿಸಿದಿ ||೨||

ಮೇದಿನಿಗೆ ಪತಿಯೆಂದೆನಿಸಿ ದಾಸರ ಪ್ರಿಯ
ಮೇದಿನಿಸುತೆ ಮದುವ್ಯಾದಿ
ವೇದಸಮ್ಮತಗೈದಿ ಸಾಧುಜನಕಹುದಾದಿ
ಅದಿ ಶ್ರೀರಾಮ ಮಮ ಬೌದ್ಧದೇವನಾದಿ ||೩||
*******