ಯತಿರಾಜ ಯತಿರಾಜ ಕ್ಷಿತಿದೇವ ತತಿನುತ ರಾಘವೇಂದ್ರ ankita shyamasundara

 ..

ಯತಿರಾಜ ಯತಿರಾಜ

ಕ್ಷಿತಿದೇವ ತತಿನುತ ರಾಘವೇಂದ್ರ

ಆದಿಯುಗದಿ ಪ್ರಹ್ಲಾದ ಸುನಾಮದಿ

ಮೋಹದಿ ಭಜಿಸುತ ಮಾಧವನೊಲಿಸಿದ 1

ಘನ ವಿರಾಗ್ರಣಿ ಜನಪತಿ ಬಾಹ್ಲೀಕ

ನೆನಿಸಿ ದ್ವಾಪರದಿ ಜನಿಸಿದ ಗುಣನಿಧಿ 2

ವಾಸವನಾಯಕ ದಾಸಾರ್ಯರಿಗುಪ

ದೇಶಗೈದ ಗುರುವ್ಯಾಸ ಪೋಷಿಸೈ 3

ಕ್ಷೋಣಿಯೊಳಗೆ ಕುಂಭಕೋಣ ಸುಕ್ಷೇತ್ರದಿ

ವೀಣೆ ವೆಂಕಟಾಭಿಧಾನದಿ ಜನಿಸಿದ 4

ದೀನ ಜನಾಮರಧೇನು ಸುಧೀಂದ್ರರ

ಪಾಣಿಪದ್ಮಭವ ಮಾಣದೆ ಕಾಯೋ 5

ತುಂಗಭದ್ರ ಸುತರಂಗಿಣಿ ತೀರದಿ

ಕಂಗೊಳಿಸುವ ಶತಪಿಂಗಳ ತೇಜ6

ಕಲುಷ ಕುಲಾದ್ರಿಗೆ ಕುಲಿಶನೆಂದೆನಿಸಿದ

ಅಲವ ಬೋಧಮತ ಜಲಧಿ ಶಶಾಂಕ 7

ಬಾಲನ ಬಿನ್ನಪ ಲಾಲಿಸಿ ಪ್ರೇಮದಿ

ಪಾಲಿಪುದೈ ಮಂತ್ರಾಲಯ ನಿಲಯ8

ಪರಿಮಳ ಗ್ರಂಥವ ವಿರಚಿಸಿ ದುರ್ಮತ

ಮುರಿದು ಸಜ್ಜನರಿಗೊರೆದ ಮಹಾತ್ಮ 9

ಪರಿಪರಿಭವದೊಳು ಪರಿತಪಿಸುವೆನೈ

ಪರಮ ಕರುಣದಲಿ ಪರಿಕಿಸಿ ಪೊರೆಯೊ 10

ಕಾಮಿತದಾಯಕ ಭೂಮಿಜೆನಾಯಕ

ಶಾಮಸುಂದರನ ಪ್ರೇಮದ ಸೇವಕ 11

***