ಧನ್ಯನಾದೆನು ನಾಂ ಘನ್ನಮಹಿಮ ಶ್ರೀನಿವಾಸ ankita raghurama vittala

 ರಾಗ -  :  ತಾಳ -

ಧನ್ಯನಾದೆನು ನಾಂ ll ಪ ll

ಘನ್ನಮಹಿಮ ಶ್ರೀನಿವಾಸ ಕರುಣದಿಂದ ಒಲಿದನಿನ್ನು ll ಅ ಪ ll

ದೇಶದೇಶದಿಂದ ಸಕಲ

ದಾಸಜನರು ಬಂದು ಸದಾ

ಶ್ರೀಶ ಸಲಹೆಂದು ಕೂಗುವ

ಘೋಷ ಕೇಳಿ ಕರ್ಣಗಳಿಂ ll 1 ll

ಧಾರ್ತರಾಷ್ಟ್ರ ವೈರಿ ವಿನುತ

ಪ್ರಾರ್ಥಿಸುವರಭೀಷ್ಟ ಕೊಡುತ

ತೀರ್ಥ ಪ್ರಸಾದಗಳ ಮಾರಿಸಿ

ಅರ್ಥ ಗಳಿಸುವವನ ಕಂಡು ll 2 ll

ರಥವನೇರಿ ಪದ್ಮಾವತಿ

ಪತಿಯು ಬರುವುದರಿತು ದೇವ

ಸತಿಯರೆಲ್ಲ ಮುತ್ತಿನಾ-

ರತಿಯ ಬೆಳಗುವುದು ಕಂಡು ll 3 ll

ಸಂತಸದಿ ಮಹಂತರು ಶ್ರೀ-

ಕಾಂತನ ಗುಣರಾಸಿ ಪೊಗಳಿ

ಸ್ವಾಂತನಿರ್ಮಲರಾಗಿ ಭಜಿಪ-

ರಂತರಾತ್ಮನ ಕಂಡು ll 4 ll

ಭೂಮಿಗಧಿಕ ಶೇಷಗಿರಿ

ಧಾಮಪೂರ್ಣಕಾಮ ಭಕ್ತ-

ಸ್ತೋಮವನ್ನು ಪಾಲಿಪ ಗುರು-

ರಾಮವಿಟ್ಠಲನ್ನ ಕಂಡು ll 5 ll

***