ಎಲ್ಲಿಗೇತಕೆ ಪೋಗಿ ತಲ್ಲಣಿಸುವೆಯೊ ಮನವೆ ankita raghurama vittala

   ..

ಎಲ್ಲಿಗೇತಕೆ ಪೋಗಿ ತಲ್ಲಣಿಸುವೆಯೊ ಮನವೆ

ಇಲ್ಲೆ ಶ್ರೀಹರಿಯಿಲ್ಲವೆ ಪ

ಬಲ್ಲವರ ಹೃದಯಗುಹೆಯಲ್ಲಿ ಪ್ರಕಟಿಸುತ ಜನ

ರೆಲ್ಲ ವಸ್ತುಗಳಲ್ಲಿ ತುಂಬಿ ಸೂಸುತಲಿರುವ ಅ.ಪ

ಕಾಶಿ ರಾಮೇಶ್ವರ ಬದರಿ ತಿರುಪತಿಯೆಂದು

ಘಾಸಿಗÉೂಳ್ಳುವೆ ಏತಕೋ

ವಾಸನೆಯ ನೀಗದವನಾಶೆಪಾಶಗಳಿಂದ

ಬೇಸತ್ತು ಚರಿಸಲೇಕೋ

ಈಶನಾವಾಸವೀಜಗವೆಲ್ಲವಿಲ್ಲಿಲ್ಲ

ವಲ್ಲಿರುವನೆಂಬುದೇಕೋ

ಶ್ರೀಶ ಶ್ರೀಹರಿಯ ನೀನಿರುವಲ್ಲೆ ಶೋಧಿಸುವ

ಆಸೆಯುದಯಿಸಲಿಲ್ಲವೇಕೋ 1

ಅಣುಮಹತುಗಳಲ್ಲಿ ತೃಣಜೀವಕೋಟಿಯಲಿ

ಗುಣ ಮಹಿಮನರಿಯ ಬಯಸೋ

ಎಣಿಸಲಾಗದನಂತಗುಣನ ಪ್ರಾಣಿ ಸಮೂಹ

ಗಣಗಳೊಳು ಕಾಣಬಯಸೋ

ಅಣುವಿಗಣುವೆನಿಸಿ ಮಹತಿಗೆ ಮಹತ್ತಹನ

ಕಣ್ದಣಿಯೆ ಕಾಣುತ ಭಾವಿಸೊ

ಗುಣನಿಧಿಯು ನಿನ್ನ ಶ್ರದ್ಧಾಭಕ್ತಿಗಳಿಗೊಲಿದು

ಕ್ಷಣದಿ ಕಾಣಿಸುವನಿದನರಿತು ನೀ ಚರಿಸೋ 2

ವ್ರತನಿಯಮಗಳ ಕಾಮ್ಯ ಫಲದಾಸೆಯಿಂ ಮಾಡೆ

ಫಲವೇನು ವ್ಯರ್ಥಶ್ರಮವೋ

ಸತತ ನಿನ್ನಯ ವ್ಯಾಪ್ತ ಮಹಿಮೆಯರಿಯದೆ ಪೂಜೆ

ಮಾಡಿದರು ವ್ಯರ್ಥಶ್ರಮವೋ

ಮತಿವಿಕಳ ಕೋಪ ತಾಪದ ದಾಸನವ ಮಾಳ್ಪ

ದಾನವದು ವ್ಯರ್ಥಶ್ರಮವೋ

ಅಕಳಂಕಮಹಿಮ ರಘುರಾಮವಿಠ್ಠಲನೆಂದು

ನಂಬಿ ನಡೆವುದೆ ಸಾರ್ಥಕವೋ 3

****