ಘನ ಸುಖಮಂ ಪಡಿ ಇನಿಯನ ವಶದಿ ankita karpara narahari

ಘನ ಸುಖಮಂ ಪಡಿ ಇನಿಯನ ವಶದಿ

ಮನಸಿಜನಯ್ಯನ ದಯದಿಂದ ಬಾಲೆ ಪ

ಮನೆಗೆಲಸಗಳನು ದಿನಗೈಯುತ ಬಲು

ವಿನಯ ಸೌಶೀಲ್ಯದಿ ವನಿತೆಯರೊಳು ನೀ 1

ಪತಿಯನು ಪರದೇವತೆಯೆಂಬುವ ಮಹಾ

ಮತಿಯಲಿ ಸೇವಿಸಿ ಸುತರನು ಪಡೆದು ನೀ 2

ಗುರುಜನರಿಗೆ ಸದಾಶಿರಬಾಗುತ ಬಹು

ಸರಸದಿ ಸದ್ಗುಣಾಭರಣಗಳಿಂದ ನೀ 3

ರತಿಪತಿ ಪಿತನಿಗೆ ಪ್ರತಿಮೆಗಳೆನ್ನುತ

ಅತಿಥಿಗಳನು ಸಂತತ ಸತ್ಕರಿಸುತ 4

ಗಿರಿಜೆಯ ಪೂಜೆಯನು ನಿರುತದಿಗೈಯುತ

ಸಿರಿಕಾರ್ಪರ ನರಹರಿಯನು ಸ್ಮರಿಸುತ 5

****