ಮೂರ್ತಿಮಂತ ಮೋದಚಂದ್ರಾ ಕೀರ್ತಿಕಾಂತಿ ರಾಘವೇಂದ್ರಾ ankita vittalesha

 ankita ವಿಠಲೇಶ  

ರಾಗ: ಸಿಂಧುಕಾಪಿ  ತಾಳ: ಕವ್ವಾಲಿ

ಮೂರ್ತಿಮಂತ ಮೋದಚಂದ್ರಾ

ಕೀರ್ತಿಕಾಂತಿ ರಾಘವೇಂದ್ರಾ ತೋರು ದಾರಿಯ ದೇವಾ  ಪ

ಘನಘೋರಭವಕೆ ಬಲಿಯಾಗಿ

ಮನಸಿಜನ ಬೇಟೆಮೃಗವಾಗಿ

ತನುಮನದಾವಾಗ್ನಿ ಬಲುತಾಗಿ

ಹೊಣೆಗಾಣದೆ ಕಣ್‍ಕುರುಡನಾದೆ. . . . ತೋರು  1

ದಿನದಿನಕೆ ಮೋಸ ಮನೆಮಾಡಿ

ಧನಕಾಗಿ ತನುವನೀಡಾಡಿ

ಕೊನೆಯಲಿ ಮೃತ್ಯುವೆಡೆ ನೋಡಿ

ಮನನಡುಗಿತು ಶ್ರೀಗುರುರಾಜಾ. . . . ತೋರು  2

ಹಗಲಿರುಳು ಪಾಪಕರ್ಮದಲಿ

ಮಿಗೆ ದ್ರೋಹಿಯಾದೆ ಮುನಿರಾಯಾ

ಬಗೆಯಾವುದಯ್ಯಾ ಸುಗುಣೇಂದ್ರಾ

ನಿಗಮಾರ್ಥಮಹನ್ಮತಿಸಾಂದ್ರಾ. . . . ತೋರು  3

ಅಪರಾಧಿ ಎಂದು ಕುಪಿಸಿದೊಡೆ

ಉಪಜೀವಿ ಎನಗೆ ಬಾಳುವೆಯೇ

ಅಪರೋಕ್ಷಜ್ಞಾನಿ ಕೃಪೆಮಾಡೈ

ಅಪಣಾರ್ಯಗೊಲಿದ ಗುರುರಾಯಾ. . . . ತೋರು  4

ನಿನ್ನೊರತು ಅನ್ಯಗತಿ ಯಾರೈ

ಎನ್ನೊಡೆಯ ದಾಸಕುಲದೈವಾ

ಚಿನ್ಮಣಿ ವಿರಾಜ ವಿಠಲೇಶಾ

ಇನ್ನಾದರು ಜ್ಞಾನವನೀಡೈ. . . . ತೋರು  5

***