ಗುರುಪಾದಕ್ಕೆರಗಿರೋ ಶಿರವ ಬಾಗಿ ನಮಿಸಿರೋ ankita kanteshapriya vittala

 ರಾಗ: ಸೌರಾಷ್ಟ ತಾಳ: ಆದಿ

ಗುರುಪಾದಕ್ಕೆರಗಿರೋ ಶಿರವ ಬಾಗಿ ನಮಿಸಿರೋ

ದುರಿತಕಳೆದುಪೊರೆವ ಗುರು ರಾಘವೇಂದ್ರರ ಪ

ಅಜನಸೇವಿಸೀ ಹರಿಯಭಜನೆ ಮಾಳ್ದರಾ

ವೃಜಿನದೂರವೂ ಇವರಭಜಿಸಿ ಪಾಡಲೂ 1

ಭೂಪತಿಯೆನಿಸಿದಾ ಭುವಿಲಿ ಶ್ರೀಪತಿಯಸ್ತುತಿಸಿದಾ

ಪಾಪ ಸ್ವಲ್ಪವೂ ಸ್ಮರಿಸೆ ಲೇಪವಾಗದೂ 2

ಹರಿಯತುತಿಸಿದಾ ನರಹರಿಯತೋರಿದಾ

ಪರಮಪೂಜ್ಯರೂ ಇವರು ಕರುಣಾಪೂರ್ಣರೂ 3

ಯತಿವ್ಯಾಸರೆನಿಸಿದಾ ಮಧ್ವಮತವಸಾರಿದಾ

ತುತಿಸಿಪೊಗಳಲೂ ಮಂದಮತಿಯು ದೂರವೂ 4

ಮೋದತೀರ್ಥರಾ ತತ್ವವಾದಪೇಳ್ದರಾ

ಖೇದವಾಗದೂ ಇವರಪಾದ ಸ್ಮರಿಸಲೂ 5

ಏಸುಜನುಮದಾ ಪಾಪರಾಶಿಕಳೆವರು

ವಾಸುದೇವನೂ ಇವರಲಿ ವಾಸಿಸಿಪ್ಪನೂ 6

ಘನ್ನಮಹಿಮರೂ ಇವರು ಪಾವನ್ನಚರಿತರೂ

ಧನ್ಯರೇ ಸರಿ ಇವರ ಅನನ್ಯಭಜಿಪರೂ 7

ಏಳುನೂರುವರುಷವೂ ಈಧರೆಯೊಳಿಪ್ಪರೂ

ಏಳೇಳುಜನುಮದಾಕೃತ ಪಾಪಕಳೆವರೂ 8

ಶಾಂತಗುರುಗಳಾ ಅಂತರಂಗದಿ ಸ್ತುತಿಪರಾ

ಕಾಂತೇಶಪ್ರಿಯವಿಠಲನೂ ಅನಂತಕಾಯ್ವನೂ 9

***