ಸ್ವಾತಂತ್ರ್ಯವೆನಗುಂಟೆ ಸರ್ವಾಂತರ್ಯಾಮಿ ankita uragadrivasa vittala

ಸ್ವಾತಂತ್ರ್ಯವೆನಗುಂಟೆ ಸರ್ವಾಂತರ್ಯಾಮಿ ಪ

ನಿಂತು ನೀ ನಡೆಸುವಿಯೊ ಜೀವಾಂತರ್ಯಾಮಿ ಅ.ಪ

ಜೀವ ಸ್ವರೂಪದಲಿ ಜೀವನಾಕಾರದೊಳಿದ್ದು

ಜೀವನ ಅನಾದಿಕರ್ಮ ಜೀವರಿಗೆ ಪ್ರೇರಿಸಿ

ಜೀವಕೆ ಚೇತನ ಕೊಟ್ಟು ಜೀವಕ್ರಿಯೆಗಳನ-

ಭಿವ್ಯಕ್ತಿ ಮಾಡಿ ಸತತ ಪೊರೆಯುವ ಕರುಣಿ 1

ದತ್ತಸ್ವಾತಂತ್ಯ ತನಗಿತ್ತಿಹನು ದೇವನೆಂದು-

ನ್ಮತ್ತತನದಿ ತಾ ಕರ್ತನೆಂದೆನಿಸಿ ಸುತ್ತಲಹ

ನಿತ್ಯ ಅವಸ್ಥೆಗಳ ಪರಿಹರಕೆ

ಶಕ್ತನಾಗನು ಏಕೆ ಆಪತ್ತುಗಳು ಬರಲು 2

ಬಾರದಿರೆ ಸೃಷ್ಟಿಗೆ ಕಾರ್ಯವಿಲ್ಲದೆ ಜೀವ

ಪೂರ್ಣವಾಗಿ ತಾ ಜಡನಂತಿಹಾ

ಕರಣದಲಿ ಶ್ರೀರಮಣ ಸೇರಿ ಚೇತನ ಕೊಟ್ಟು

ಕ್ರೀಡೆಗೋಸುಗ ಬಿಡುವ ಸರ್ವ ಜೀವರನಾ 3

ಎನ್ನ ಅನಾದಿಕರ್ಮ ಎನ್ನದೆಂದಿಗು ಸರಿಯೆ

ನಿನ್ನದಲ್ಲಾ ಸ್ವಾಮಿ ಎನ್ನನುಭವಕೆ ಕೊಡುವೆ

ಮುನ್ನ ಪ್ರಳಯದಿ ನಿನ್ನ ಘನ್ನೊಡಲೊಳಿಂಬಿಟ್ಟೆ

ಎನ್ನ ಕರ್ಮಗ್ರಂಥಿ ಎನ್ನಿಂದ ಬಿಡಿಸೊ 4

ಲಿಂಗದೇಹಕ್ಕಾಗಿ ತ್ರಿಗುಣ ಅಂಗಿಯ ಕೊಟ್ಟೆ

ಅಂಗಬೇಕೆಂದಿತ್ತೆ ಅನಿರುದ್ಧ ಲಿಂಗಾ

ಅಂಗಕಾರ್ಯಕೆ ಎನಗೆ ಸ್ಥೂಲಾಂಗಗಳ ಕೊಟ್ಟು

ಅಂಗೋಪಾಂಗದಲಿ ನೀನ್ಹಾಂಗೇ ಮೆರೆವೆ 5

ವಿಷಯಗಳಿಂದ್ರಿಯಕೆ ವಿಷಮವಾಗಿಹವೋ ದೇವ

ಹೃಷೀಕಪನೆ ನಿನಗೆ ಇದು ಸಂತೋಷವೇನೊ

ತೃಷಿಹಸಿವು ಕೊಡದೆ ದುರ್ವಿಷಯಗಳಿಗೆ ಬಿಡದೆ

ಈಷಣತ್ರಯ ಹರಿಸಿ ಪೋಷಿಸೋ ದೇವಾ 6

ತರುಛಾಯ ವೃತ್ತಿಯು ತರಣಿ ಬಿಟ್ಟಿಪ್ಪುದೆ

ತರಣಿಕಿರಣನನುಸರಿಸಿ ವೃತ್ತಿಯಹುದೊ

ಕರಣನಿಯಾಮಕ ನೀನೆ ಕಾರ್ಯವ ನಡೆಸಲು ದೇವ

ತ್ವರಿತದಲಿ ಸ್ಥೂಲದಲಿ ಕಾರ್ಯಾಭಿವ್ಯಕ್ತಿಯೊ 7

ನೀನಿತ್ತ ಸ್ವಾತಂತ್ರ್ಯಕಾರ್ಯ ಮುಕ್ತಿಯಲ್ಲಿ

ನಾನತ್ತು ಫಲವೇನೊ ಸ್ಥಿತಿಕಾಲದಿ ನೀನಿಲ್ಲದಿನ್ನಿಲ್ಲ

ತ್ರಿಗುಣ ಬದ್ಧರ ಕಾರ್ಯ ನೀ ಚಲಿಸೆ

ಪ್ರತಿಬಿಂಬ ಕಾರ್ಯವಹುದೋ 8

ಹೆಚ್ಚು ಮಾತೇನು ಜೀವನಿಚ್ಛೆಯನನುಸರಿಸಿ

ಅಚ್ಯುತ ತಾನೆ ಸ್ವೇಚ್ಛಚರಿಸಿ

ನಿಚ್ಚದಲಿ ಲಿಂಗಾನಿರುದ್ಧದಿ ತಾನಿದ್ದು

ಎಚ್ಚರಿಸಿ ಸ್ಥೂಲದಿಂದೆಚ್ಚರದಿ ನಡೆವುದೊ 9

ನಿನ್ನ ಸಂಕಲ್ಪವಲ್ಲದಿನ್ನಿಲ್ಲ ಅನ್ಯಥಾಗುವುದುಂಟೆ

ಎಂದೆಂದಿಗೂ ಘನ್ನ ಮಹಿಮನೆ ಎನ್ನ

ಯತ್ನವಾವುದೋ ಕಾಣೆ ಎನ್ನ ಭ್ರಾಮಕತ್ರಯವ

ಇನ್ನು ಹರಿಸೋದೇವಾ 10

ಶ್ರೀದನಿಂ ದತ್ತಸ್ವಾತಂತ್ರ್ಯ ಸಮ್ಮತವೇನು

ಅಧೀನ ಸ್ವಾತಂತ್ರ್ಯಕಾರ್ಯದಲ್ಲಿ ಮೋದನಾಮಕ ನೀನೆ

ಆದರಿಸಿ ಸಲಹಯ್ಯ ಮೋದತೀರ್ಥಾ-

ರಾಧ್ಯ ಶ್ರೀ ವೇಂಕಟೇಶಾ11

*****