ಎನ್ನಪರಾಧವೇನು ನಿನ್ನ ಸೂತ್ರಾಡಿಸಿಧಾಂಗ ankita mahipati

ಭೈರವಿ ರಾಗ ದಾದರಾ ತಾಳ

ಎನ್ನಪರಾಧವೇನು ?
ನಿನ್ನ ಸೂತ್ರಾಡಿಸಿಧಾಂಗ ಆಡುವೆ ಹರಿ ||ಪ||

ಆಡಿಸಿದರಾಡುವೆ ನೋಡಿಸಿದರೆ ನೋಡುವೆ
ಮಾಡಿಸಿದರೆ ಮಾಡುವೆ ಪ್ರೇರಿಸಿದ್ಹಾಂಗೆ ||೧||

ನಡಿಸಿದರೆ ನಡೆವೆ ಕೂಡಿಸಿದರೆ ಕೂಡುವೆ
ನುಡಿಸಿದರೆ ನಾ ನುಡಿವೆ ಚೇತಿಸಿದಂತೆ ||೨||

ಉಡಿಸಿದರೆ ಉಡುವೆ ತೊಡಿಸಿದರೆ ತೊಡುವೆ
ಇಡಿಸಿದರೆ ನಾ ಇಡುವೆ ಸರ್ವ ಭೂಷಣಾ ||೩||

ಹೇಳಿಸಿದರೆ ಹೇಳುವೆ ಕೇಳಿಸಿದರೆ ಕೇಳುವೆ
ಆಳಿಸಿದರೆ ಆಳುವೆ ಅನುವಾದ್ಹಾಂಗ ನೀ ||೪||

ಕಲಿಸಿದರೆ ಕಲಿವೆ ಬಲಿಸಿದರೆ ಬಲಿವೆ
ಮಲಗಿಸಿದರೆ ಮಲಗುವೆ ಸುಖಗೈಸಿದ್ಹಾಂಗೆ ||೫||

ನೇಮಿಸಿದರೆ ನೀ ಒಂದು ನಾ ಮಾಡುವುದು ಒಂದು
ನಿಮಿತ್ಯ ಮಾಡಿ ದೋರುದು ಸೋಜಿಗಿದೊಂದು ||೬||

ಎನ್ನ ಬಾಹ್ಯಾಂತ್ರ ಪೂರ್ಣ ಚೆನ್ನಾಗಿರೆ ನೀ ಕರುಣಾ
ಚೆನ್ನ ಮಹಿಪತಿಗಭಿಮಾನಾ ನಿನ್ನದೇ ಅನುದಿನಾ ||೭||
*********