ಯಾಕೆ ಮರುಳಾದೆ ಹೀಂಗೆ ಎಲೆ ಮನವೆ ankita helavana katte

 ಯಾಕೆ ಮರುಳಾದೆ ಹೀಂಗೆ ಎಲೆ ಮನವೆ

ಕಾಕು ಬುದ್ಧಿಯ ಬಿಡು ಬಿಡು ಸುಮ್ಮನೆ ಪ.

ಧನದಾಸೆಯನು ಮರಿ ಮನುಮಥನ

ಬಾಣಕಳುಕದಿರು ತೊಳಲದಿರು

ನೆಲದಾಸೆಗೆ ನೀನದರ

ಅನುವರಿತು ಹರಿಯ ಸ್ಮರಿಸು ಮನವೆ 1

ಅನ್ಯರಾಗುಣ ದೋಷಯಣಿಸದಲೆ

ನಿನ್ನಿರವ ನೋಡು ಕಂಡ್ಯಾ ಮನವೆ

ಬಂಣಗಾರಿಕೆಯು ಬರಿದೆ ಔದಂಬ್ರ-

ಹಣ್ಣಿನಂತೀ ಕಾಯವು ಮನವೆ 2

ತಮ್ಮ ಬುದ್ದಿ ತಲೆಗೆ ಸುತ್ತಿ ಸಂಸಾರ

ಭ್ರಮೆಗೊಂಡು ಬಳಲಾದಿರೋ

ಕಮಲಪತ್ರಕ್ಕೆ ಒಳಗಿನ ಜಲದಂತೆ

ನೆಲಕೆ ನಿರ್ಲೇಪನಾಗೋ ಮನವೆ 3

ಈ ದೇಹ ಸ್ಥಿರವಲ್ಲವೊ ಕಾಲನಾ

ಬಾಧೆಗೋಳಗಾಗದಿರೋ ಮನವೆ

ಭೇದ ದುರ್ಗುಣವ ತ್ಯಜಿಸು ನೀ

ಗೇರುಬೀಜದಂದದಿ ತಿಳಿಯೊ ಮನವೆ 4

ಮಾಡು ಹರಿಸೇವೆಯನ್ನು ಮನದಣಿಯೆ

ಬೇಡು ಹರಿಭಕ್ತಿಯನ್ನು

ಕೂಡು ಹೆಳವನಕಟ್ಟೆಯ ವೆಂಕಟನ

ಬೇಡಿ ಮುಕ್ತಿಯನು ಪಡೆಯೊ ಮನವೆ 5

***