ಶ್ರೀವೆಂಕಟಾಚಲ ನಿವಾಸ ankita jagannatha vittala SRI VENKATACHALA NIVASA

 ಶ್ರೀವೆಂಕಟಾಚಲ ನಿವಾಸ

 

csr

ಶ್ರೀ ವೇಂಕಟಾಚಲ ನಿವಾಸ ನಾ ನಿನ್ನ

ಸೇವಾನುಸೇವಕರ ದಾಸ ಎನಿಸಿ

ಜೀವಿಸುವ ನರಗೆ ಆಯಾಸ ಯಾಕೆ

ಶ್ರೀವರನೆ ಕೊಡು ಎನಗೆ ಲೇಸಾ || 1 ||

ಸ್ವಾಮಿ ಕಂಸಾರಿ ಪ್ರಭು ನಿನ್ನ ದಿವ್ಯ

ನಾಮ ಒದಗಲು ಜಿಹ್ವೆಗೆನ್ನ ದೋಷ

ಸೀಮೆಗಾಣದಿದ್ದರೆನ್ನ ಸ್ವಾಮಿ

ನೀ ಮರೆಯಲಾಗದೊ ಸುಪ್ರಸನ್ನ || 2 ||

ನೀಚ ಯೋನಿಗಳಲ್ಲಿ ಬಂದೆ ಇನ್ನು

ನಾಚಿಕಿಲ್ಲವೊ ಎನಗೆ ತಂದೆ ನೀನೆ

ಮೋಚಕನು ಬಿನ್ನಪವಿದೆಂದೆ ಸವ್ಯ

ಸಾಚಿಸಖ ಕೈಪಿಡಿಯೋ ಮುಂದೆ || 3 ||

ನಾನೊಬ್ಬನೇ ನಿನಗೆ ಭಾರ ಆದೆ

ನೇನೊ ಸಂತತ ನಿರ್ವಿಕಾರ ಎನ್ನ

ಹೀನತ್ವ ನೋಡಲ್ಕಪಾರ ಚಕ್ರ

ಪಾಣಿ ಮಾಡಿದಿರೆನ್ನ ದೂರ || 4 ||

ಕಂಡ ಕಂಡವರಿಗಾಲ್ಪರಿದು ಬೇಡಿ

ಬೆಂಡಾದೆ ನಿನ್ನಂಘ್ರಿ ತೊರೆದು ದಿಟ

ತೊಂಡವತ್ಸಲನೆಂಬ ಬಿರುದು ಕಾಯೊ

ಪುಂಡರೀಕಾಕ್ಷ ನೀನರಿದು || 5 ||

ಈ ಸಮಯದೊಳಗೆನ್ನ ತಪ್ಪ ನೋಡಿ

ನೀ ಸಡಿಲ ಬೇಡುವರೇನಪ್ಪ ನಿನ್ನ

ದಾಸರ್ಪೆಸರ್ಗೊಳಲು ಬಪ್ಪ ದೋಷ

ನಾಶವಾಗೋದು ತಿಮ್ಮಪ್ಪ || 6 ||

ಕಾಮಾದಿಗಳ ಕಾಟದಿಂದ ನಿನ್ನ

ನಾ ಮರೆದೆ ಸಚ್ಚಿದಾನಂದ ಎನ್ನ

ಈ ಮಹಾ ದೋಷಗಳ ವೃಂದ ನೋಡದೆ

ನೀ ಮನ್ನಿಸೆನ್ನ ಮುಕುಂದ || 7 ||

ನೀ ಪಿಡಿದರೆ ಸಹಸ್ರಾರ ಸುಜನ

ಪಾಪಾಟವಿಗೆ ಸುಕುಠಾರಾ ಜಗ

ದ್ವ್ಯಾಪಕನೆ ಎನ್ನ ಸಂಸಾರ ಘೋರ

ಕೂಪದಿಂದೆತ್ತಯ್ಯ ಧೀರ || 8 ||

ಸಿಂಧೂರ ರಾಜ ಪರಿಪಾಲ ಕೋಟಿ

ಕಂದರ್ಪ ಲಾವಣ್ಯ ಶೀಲ ಧರ್ಮ

ಮಂದಾರ ಭೂಜಾಲವಾಲ ಯೋಗಿ

ಸಂದೋಹ ಹೃತ್ಕುಮುದ ಶೀಲಾ || 9 ||

ಶಿವನ ವೈರಿಯ ಕೊಂದ ಶಕ್ತ ಪುಣ್ಯ

ಶ್ರವಣ ಕೀರ್ತನ ನಿನ್ನ ಭಕ್ತ ಜನರ

ಭವದೊಳಗೆ ದಣಿಸುವುದು ಯುಕ್ತವೇನೊ

ಭುವನ ಪಾವನ ನಿತ್ಯಮುಕ್ತ || 10 ||

ಶ್ರೀಕರ ಶ್ರೀಮದಾನಂತ ನಿಖಿಳ

ಲೋಕೈಕನಾಥ ನಿನ್ನಂಥ ಸಖರ

ನಾ ಕಾಣೆನೆಲ್ಲೂ ಮಹಾಂತಾ ಎನ್ನ

ನೀ ಕಾಯೋ ಕಂಡ್ಯ ಭೂಕಾಂತಾ || 11 ||

ಕರ ಕರ್ಮ ಚಿತ್ತತ್ವಗ್ರಸನ ಕಾಯ

ಕರಣ ಮನಹಂಕಾರ ಘ್ರಾಣ ಬುದ್ಧಿ

ಚರಣ ಪಾಯೂಪಸ್ಥ ನಯನಜಾತ

ಉರುಪಾಪಿ ಕ್ಷಮಿಸು ಶ್ರೀ ರಮಣಾ || 12 ||

ಅನಿಮಿತ್ತ ಬಂಧು ನೀಯೆನ್ನ ಬಿಡುವು

ದನುಚಿತವೋ ಲೋಕಪಾವನ್ನಚರಿತ

ಮನ ವಚನ ಕಾಯದಲಿ ನಿನ್ನ ಪಾದ

ವನಜ ನಂಬಿದೆ ಸುಪ್ರಸನ್ನಾ || 13 ||

ನೀನಲ್ಲದೆನಗೆ ಗತಿಯಿಲ್ಲ ಪವ

ಮಾನವಂದಿತ ಕೇಳೋ ಸೊಲ್ಲ ಎನ್ನ

ಜ್ಞಾನ ಇಚ್ಛೆ ಕ್ರಿಯೆಗಳೆಲ್ಲ ನಿನ್ನ

ಧೀನವಲ್ಲವೆ ಲಕ್ಷ್ಮೀನಲ್ಲಾ || 14 ||

ಪ್ರಾಚೀನ ಕರ್ಮಾಂಧಕೂಪದೊಳಗೆ

ಯೋಚಿಸುವ ನರರ ಸಂತಾಪ ನಿನಗೆ

ಗೋಚರಿಸದೇನೋ ಬಹುರೂಪ ವೇಂಕ

ಟಾಚಲನಿಲಯ ಪಾಹಿ ಶ್ರೀಪಾ || 15 ||

ಯಾಕೆ ದಯ ಬಾರದೆನ್ನಲ್ಲಿ ನರಕ

ನಾಕ ಭೂ ಲೋಕಂಗಳಲ್ಲಿ ಚರಿಸಿ

ನಾ ಕಷ್ಟಪಟ್ಟ ಬಗ್ಗೆ ನೀ ಬಲ್ಲಿ ವೀತ

ಶೋಕ ಕೊಡು ಭಕುತಿ ನಿನ್ನಲ್ಲಿ || 16 ||

ನಿನ್ನಂಘ್ರಿ ದರುಶನವ ಕೊಡದೆ ಹೀಗೆ

ಬನ್ನ ಬಡಿಸುವರೇನೋ ಬಿಡದೆ ನಾನು

ಮುನ್ನ ಮಾಡಿದ ಪಾಪ ಕೆಡದೆ ನೀ ಪ್ರ

ಪನ್ನ ವತ್ಸಲನೆಂದು ನುಡಿದೆ || 17 ||

ತಾಪತ್ರಯಗಳಿಂದ ನೊಂದೆ ಮಹಾ

ಪಾಪಿಷ್ಠರಲ್ಲನ್ನ ತಿಂದೆ ಇನ್ನು

ಆಪರೇತೇಶ್ವರನ ಮುಂದೆ ಪೋಗಿ

ನಾ ಪೇಳಿಕೊಳಲೇನು ತಂದೆ || 18 ||

ದೇಹ ಸಂಬಂಧಿಗಳ ಸಹಿತವಾಗಿ

ನಾ ಹೊಂದಿದೆನು ಲೋಕಮಹಿತ ಎನ್ನ

ಮೋಹಿಪುದು ನಿನಗೇನು ವಿಹಿತ ಹೃದಯ

ಬಾಹಿರಂತರದಿ ಸನ್ನಿಹಿತ || 19 ||

ಪೋಗುತಿದೆ ದಿವಸ ಕಮಲಾಕ್ಷ ಪರಮ

ಯೋಗೇಶ ನಿನ್ನ ಅಪರೋಕ್ಷ ಎನಗೆ

ಹ್ಯಾಗಾಗುವುದೊ ಸುರಾಧ್ಯಕ್ಷ ದುರಿತ

ನೀಗು ಕಾಮಿತ ಕಲ್ಪವೃಕ್ಷ || 20 ||

ಗತಿಯಾರು ನಿನ್ನುಳಿದು ದೇವ ರಮಾ

ಪತಿ ನೀನೆ ಭಕ್ತ ಸಂಜೀವ ಎನ್ನ

ಸತಿಸುತರ ಅನುದಿನದಿ ಕಾವ ಭಾರ

ಸತತ ನಿನ್ನದು ಮಹಾನುಭಾವ || 21 ||

ದೊಡ್ಡವರ ಕಾಯ್ವುದೇನರಿದು ಪರಮ

ದಡ್ಡರನು ಕಾಯ್ವುದೇ ಬಿರುದು ಎನ್ನ

ಗುಡ್ಡದಂತಿಹ ಪಾಪ ತರಿದು ಕಾಯೋ

ವಡ್ಡಿ ನಾಯಕ ಸಾರೆಗರದೊ || 22 ||

ಜ್ಞಾನಿಗಳು ನೀಚರಲಿ ಕರುಣ ಮಾಡ

ರೇನೋ ಬಿಡುವರೇ ರಥಚರಣ ಪಾಣಿ

ಭಾನು ಚಂಡರವಿಕಿರಣ ಬಿಡದೆ

ತಾನಿಪ್ಪನೆ ರಮಾರಮಣ || 23 ||

ಆಡಲ್ಯಾತಕೆ ಬಹಳ ಮಾತಾ ಪರರ

ಬೇಡಲಾರೆನೋ ಜಗತ್ರಾತಾ ಹೀಗೆ

ಮಾಡುವರೇ ಕೇಳೆನ್ನ ಮಾತ ನೀನೆ

ನೀಡೆನಗೆ ಪುರುಷಾರ್ಥ ದಾತಾ || 24 ||

ಬೇಡಲ್ಯಾತಕೆ ಬಹಳ ಮಾತಾ ಎನ್ನ

ಕೇಡು ನಿನ್ನದಲ್ಲೇ ಬಲಿಧೌತ ಪಾದ

ಬೇಡಿಕೊಂಬುವೆ ನಾನು ನಾಥ ದೂರ

ನೋಡಲಾಗದು ಪಾರ್ಥಸೂತ || 25 ||

ಸಾರಸದ್ಭಕ್ತಿಯಲಿ ನಿತ್ಯ ಬಿಡದೆ

ಶಾರದೇಶನ ತುತಿಪ ಭಕ್ತಜನರ

ಪಾರ ಸಂತೈಸುವುದು ಮಿಥ್ಯವಲ್ಲ

ಶ್ರೀರಮಣ ಸಾಕ್ಷಿದಕೆ ಸತ್ಯ || 26 ||

ಫಣಿರಾಜಶಯನ ಪರಿಯಂಕ ಶಯನ

ಪ್ರಣತಾರ್ತಿಹರನೆಂಬೊ ಅಂಕ ಕೇಳಿ

ಮಣಿದೆ ನಿನ್ನಂಘ್ರಿಗೆ ಶಶಾಂಕ ಭಾಸ

ದಣಿಸಲಾಗದು ನಿಷ್ಕಳಂಕ || 27 ||

ಕಾರ್ತವೀರ್ಯಾಜುನನ ಕೊಂದ ಭವ್ಯ

ಕೀರ್ತಿ ನಿನ್ನಾನಂದ ವೃಂದ ಸತತ

ಕೀರ್ತಿಸುವ ನರರ ಬಹುಕುಂದ ನೋಡ

ದಾರ್ತನ್ನ ಪೊರೆಯೊ ಗೋವಿಂದ || 28 ||

ದಯದಿಂದ ನೋಡೆನ್ನ ಹರಿಯೆ ಜಗ

ನ್ಮಯನೆ ಜ್ಞಾನಾನಂದ ಸಿರಿಯೆ ಮನೋ

ಭಯವ ಪರಿಹರಿಸಿನ್ನು ಧೊರೆಯೆ ಸರ್ವ

ಭಯದೂರರಿನ್ನೊಬ್ಬರರಿಯೇ || 29 ||

ನರಸಿಂಹ ನಿನ್ನುಳಿದು ಜಗವ ಕಾಯ್ವ

ಪರದೈವರುಂಟೆಂದು ಬಗೆವ ನರರ

ಪರಮೇಷ್ಠಿ ರಾಯನು ನಗುವ ನಿತ್ಯ

ನಿರಯಾಂಧ ಕೂಪದೊಳು ಹುಗಿವ || 30 ||

ದಾಸ ದಾಸರ ದಾಸನೆಂದು ಬಿಡದೆ

ನೀ ಸಲಹೋ ಎನ್ನನೆಂದೆಂದೂ ನಿನ್ನ

ನಾ ಸೇವಿಸುವೆ ಕೃಪಾಸಿಂಧು ಎಮ್ಮನು

ದಾಸೀನ ಮಾಡದಿರು ಬಂಧು || 31 ||

ಎಂದೆಂದು ನೀ ಬಡವನಲ್ಲ ನಿನ್ನ

ಪೊಂದಿದವನ ಬಿಡುವನಲ್ಲ ಹೃದಯ

ಮಂದಿರದೊಳಗೆ ಬಲ್ಯಲ್ಲ ಚಿದಾ

ನಂದ ನೀ ಭಕ್ತ ವತ್ಸಲ |\ 32 ||

ಕಾಮಿತಪ್ರದನೆಂಬ ಬಿರುದು ಕೇಳಿ

ನಾ ಮುದದಿ ಬಂದೆನೋ ಅರಿದು ಎನ್ನ

ತಾಮಸ ಮತಿಗಳನ್ನು ತರಿದು ಮಮ

ಸ್ವಾಮಿ ನೋಡೆನ್ನ ಕಣ್ತೆರೆದು || 33 ||

ಹಿತವರೊಳು ನಿನಗಧಿಕರಾದ ತ್ರಿದಶ

ತತಿಗಳೊಳು ಕಾಣೆನೋ ಪ್ರಮೋದ ನೀನೆ

ಗತಿಯೆಂದು ನಂಬಿದೆ ವಿವಾದವ್ಯಾಕೊ

ಪತಿತಪಾವನ ತೀರ್ಥಪಾದ || 34 ||

ಮಡದಿ ಮಕ್ಕಳ ತಂದೆ ತಾಯಿ ಎನ್ನ

ಒಡಹುಟ್ಟಿದವರ ನೀ ಕಾಯಿ ಲೋಕ

ದೊಡೆಯ ನೀನಲ್ಲದಿನ್ನಾರೈ ಎನ್ನ

ನುಡಿಯ ಲಾಲಿಸೋ ಶೇಷಶಾಯಿ || 35 ||

ಅನುಬಂಧ ಜನರಿಂದ ಬಪ್ಪ ಕ್ಲೇಶ

ಅನುಭವಿಸಲಾರೆ ಎನ್ನಪ್ಪ ಉದಾ

ಸೀನ ಮಾಡಿ ದಯಮಾಡದಿಪ್ಪರೇನೋ

ಘನ ಮಹಿಮ ಫಣಿರಾಜತಲ್ಪ || 36 ||

ಹದಿನಾಲ್ಕು ಲೋಕಂಗಳಾಳ್ವ ಬ್ರಹ್ಮ

ಮೊದಲಾದವರು ನಿನ್ನ ಚೆಲ್ವನಖದ

ತುದಿ ಬಣ್ಣ ಕಂಡು ಕಡೆ ಬೀಳ್ವದಿಲ್ಲ

ವಿಧಿಸಲಾಪೆನೆ ನಿನ್ನ ಸಲ್ವಾ || 37 ||

ಧನ ಧಾನ್ಯ ಪಶು ಪತ್ನಿ ಗೇಹ ಜನನೀ

ಜನಕ ಜಾಮಾತ ಸಖ ನೇಹ ಅನುಜ

ತನುಜಾಪ್ತವರ್ಗದಿಂದಾಹ ಸೌಖ್ಯ

ನಿನಗರ್ಪಿಸಿದೆ ಎನ್ನ ದೇಹ || 38 ||

ನೀನಿತ್ತ ಸಂಸಾರದೊಳಗೆ ಸಿಲುಕಿ

ನಾ ನೊಂದೆ ಕರೆ ನಿನ್ನ ಬಳಿಗೆ ಚರಣ

ಧ್ಯಾನ ದೊರಕಲು ಭವದಿ ಮುಳುಗೆ ನಿನ್ನ

ಕಾಣದಿರಲಾರೆನರೆಘಳಿಗೆ || 39 ||

ಸಲುಗೆ ಬಿನ್ನಪವ ನೀ ಕೇಳೋ ಎನ್ನ

ಬಲು ದುರುಳತನವ ನೀ ತಾಳೋ ನೀನೆ

ನೆಲೆಯಿಲ್ಲದೆನಗ್ಯಾರು ಪೇಳೋ ಎನ್ನ

ಕುಲದೈವ ಬಹುಕಾಲ ಬಾಳೋ || 40 ||

ಸಾಂದೀಪ ನಂದನನ ತಂದ ನಂದ

ನಂದನನೆ ಎನ್ನ ಭಯವೃಂದ ಕಳೆದು

ಎಂದೆಂದು ಕುಂದದಾನಂದವೀಯೋ

ಇಂದಿರಾರಮಣ ಗೋವಿಂದ || 41 ||

ವಿಶ್ವ ತೈಜಸ ಪ್ರಾಜ್ಞ ತುರಿಯ ಎನ್ನ

ದುಸ್ವಭಾವವ ನೋಡಿ ಪೊರೆಯದಿಹರೆ

ನಿಸ್ಪೃಹ ನಿನ್ನಂಘ್ರಿ ಮೊರೆಯ ಹೊಕ್ಕೆ

ಅಸ್ವತಂತ್ರನ ಕಾಯೋ ಪಿರಿಯ || 42 ||

ಇಹಪರದಿ ಸೌಖ್ಯಪ್ರದಾತ ನೀನೆ

ಅಹುದೋ ಲೋಕೈಕ ವಿಖ್ಯಾತ ಮಹಾ

ಮಹಿಮ ಗುಣಕರ್ಮ ಸಂಜಾತ ದೋಷ

ದಹಿಸು ಸಂಸಾರಾಬ್ಧಿ ಪೋತ || 43 ||

ಲೋಕಬಾಂಧವನೆಂಬ ಖ್ಯಾತಿಯನ್ನು

ನಾ ಕೇಳಿದೆನು ಖಳಾರಾತಿ ಮನೋ

ಶೋಕ ಮೋಹಾಜ್ಞಾನ ಭೀತಿ ಬಿಡಿಸು

ಶ್ರೀ ಕರಾರ್ಚಿತ ಸ್ವಯಂ ಜ್ಯೋತಿ || 44 ||

ಒಂದು ಗೇಣೊಡಲನ್ನಕಾಗಿ ಅಲ್ಪ

ಮಂದಭಾಗ್ಯರ ಮನೆಗೆ ಪೋಗಿ ದೈನ್ಯ

ದಿಂದ ಸತ್ಕರ್ಮಗಳ ನೀಗಿ ಕಂದಿ

ಕುಂದಿದೆನೋ ಸಲಹೋ ಲೇಸಾಗಿ || 45 ||

ಪಾತಕರೊಳಗಧಿಕ ನಾನಯ್ಯ ಜಗ-

ತ್ಪಾತಕವ ಕಳೆವ ಮಹಾರಾಯ ನಿನ್ನ

ದೂತ ನಾನಲ್ಲವೆ ಜೀಯ ಜಗ-

ನ್ನಾಥ ವಿಠ್ಠಲ ಪಿಡಿಯೋ ಕೈಯಾ || 46 ||

***