ನಿತ್ಯವೆಂಬುದ ಕೇಳು ಜೀವ ಬಲು ನಿತ್ಯವೆಂಬುದು ಈಗ ಬಾಳುವ ಕಾಯ ankita hayavadana

 ..

(ಅ?)ನಿತ್ಯವೆಂಬುದ ಕೇಳು ಜೀವ ಬಲು

ನಿತ್ಯವೆಂಬುದು ಈಗ ಬಾಳುವ ಕಾಯ ಪ.

ಸತ್ಯ ಸತ್ಯ ಸರ್ವ ಜೀವರನಿಟ್ಟುಕೊಂಡು

ವಿಸ್ತಾರವಾದೊಂದಾಲದೆಲೆಯಲ್ಲಿ ಮಲಗಿದ್ದು ಅ.ಪ.

ಹರಿ ಹ್ಯಾಗೆ ನಿತ್ಯನೊ ಹಾಗೆ ಜೀವನು ನಿತ್ಯ

ಹರಿಯೆಂಬೋ ಧಣಿಗೆ ಈ ಜೀವನು ಭೃತ್ಯ

ಹರಿ ಜೀವರೊಳಗೆ ಹೀಗೆ ತಿಳಿದವನು

ಧರೆಯೊಳಗೆಂದೆಂದಿಗು ಕೃತಕೃತ್ಯನು 1

ಹರಿಯೆಂಬೊ ರಾಜಗೆ ಗುರುಮೂರುತಿ ಮಂತ್ರಿ

ಪರಿವಾರ ಇವರಯ್ಯ ಜೀವಂಗಳು

ಅರಿತು ಈ ವಿಧದಲ್ಲಿ ನಿರುತ ಪಾಡುವರಿಗೆ

ಪರಲೋಕದಲಿ ದಿವ್ಯಭೋಗಂಗಳು 2

ಭಿನ್ನ ಭಿನ್ನ ಜೀವ ಭಿನ್ನ ಭಿನ್ನ ಕರ್ಮ-

ವೆನ್ನುವುದೆ ಘನ್ನತತ್ವಂಗಳು

ಅನ್ಯಥಾನುಡಿಯಲ್ಲ ಇನ್ನು ಸಂಶಯವಿಲ್ಲ

ಎನ್ನೊಡೆಯ ಹಯವದನ ಬಲ್ಲ 3

***