ಹೊಸ ವರ್ಷ
ಗತಿಸಿತಿನ್ನೊಂದು ವರ್ಷ
ಎಂದರು ಗಣಿತಜ್ಞರು |
ತಗ್ಗಿತೆಮ್ಮ ಶೇಷಾಯುಷ್ಯ
ಎಂದರು ಹರಿ ಭಕ್ತರು ||
ವರ್ಷದ ಗಣನೆಗೆ ಹಲವು ಗಣಿತ
ಉಂಟೆಂದರು ಗಣಿತಜ್ಞರು |
ಎಟುಕನಾವ ಗಣಿತಕು
ಅನಂತನೆಂದರು ಹರಿಭಕ್ತರು ||
ಇಂದಿನ ಸೂರ್ಯೋದಯದಿಂದ
ಮರುದಿನದ ಸೂರ್ಯೋದಯಕೆ
ಒಂದು ದಿನ ಎಂದರು ಗಣಿತಜ್ಞರು |
ಭೂದೇವಿ ತನ್ನಂತರ್ಯಾಮಿಯ
ನೆನೆದು ಸ್ವಪ್ರದಕ್ಷಿಣೆ ಗೈದಿಹಳು,
ಬರಿದೆ ದಿನವಲ್ಲವ
ಎಂದರು ಹರಿ ಭಕ್ತರು ||
ಇಂತಿಪ್ಪ ಮುನ್ನೂರ ಅರವತ್ತೈದು
ದಿನಗಳಿಗೆ ಒಂದು ಸಂವತ್ಸರವು
ಎಂದರು ಎಣಿಸುತ ಗಣಿತಜ್ಞರು |
ಬರಿದೆ ಸಂವತ್ಸರವಲ್ಲ ಭೂದೇವಿ
ತನ್ನಿನಿಯ ಇನ ನಾರಾಯಣಗೆ ಗೈದ
ಪ್ರದಕ್ಷಿಣೆಯದೆಂದರು ಹರಿ ಭಕ್ತರು ||
ಶುಕ್ಲ-ಕೃಷ್ಣ ಪಕ್ಷದ್ವಯಕೊಂದು
ಮಾಸವು, ದ್ವಾದಶ ಮಾಸಕೊಂದು
ಅನುವತ್ಸರವೆಂದರು ಗಣಿತಜ್ಞರು |
ಬರಿದೆ ಮಾಸವಲ್ಲವು, ಶಶಿಮಂಡಲ
ಮಧ್ಯಸ್ಥ ಶಿವ ಗೈದಿಹ ಲಕುಮಿಕೆ
ಪ್ರದಕ್ಷಿಣಿಯನೆಂದರು ಹರಿ ಭಕ್ತರು ||
ಇಪ್ಪತ್ತೇಳು ತಾರೆಗಳ
ದ್ವಾದಶ ಮಾಸದ ಮುನ್ನೂರ
ಇಪ್ಪತ್ನಾಕು ದಿನದ ತಾರಾ
ವತ್ಸರವೆಂದರು ಗಣಿತಜ್ಞರು |
ತಾರೆಯರು ಪೂಜಿಪರು
ತಮ್ಮಿನಿಯ ಶಶಿಯೊಳಗಿಪ್ಪ
ಶಿವನೊಳಗಿಪ್ಪ ಪ್ರಾಣನೊಳಗಿಪ್ಪ ನರಹರಿಯನೆಂದರು ಹರಿ ಭಕ್ತರು ||
ಇವೆಲ್ಲ ತೊರೆದಿಹ ಅರ್ಥವಿಲ್ಲದ
ವತ್ಸರವೊಂದನನುಸರಿಪರೀ ಜನ
ಎಂದು ಹಳಿಯೆ ಗಣಿತಜ್ಞರು |
ವರ್ಷಕೊಮ್ಮೆ ಹಳಿದು ಬಳಿಕ
ನೀವೂ ಅನುಸರಿಸುವುದು ಇದೇ
ವತ್ಸರವ ಎಂದರು ಹರಿ ಭಕ್ತರು ||
ನೋಡಿ ಎಂತು ಕುಣಿದಾಡುತಿಹರು
ಕುಡಿದು ನಲಿದು ಖಡಿದು ಜಗಿದು
ಜಡಿದು ನುಲಿದು ಈ ಜನ
ಎನಲು ಗಣಿತಜ್ಞರು |
ಅದೆಂತೇ ಇರಲಿ ಸ್ವಾಗತಿಸುವ
ನಾವೀ ನೂತನ ವ್ಯಾವಹಾರಿಕ
ವರ್ಷವ ನೆನೆಯುತ ಜನಾರ್ದನನ
ಎಂದರು ಹರಿ ಭಕ್ತರು ||
****
No comments:
Post a Comment