ವನಹೀನವಾದ ನದಿಗಳು ವ್ಯರ್ಥ ankita pranesha vittala

ವನಹೀನವಾದ ನದಿಗಳು ವ್ಯರ್ಥ

ಧನಹೀನನಾದ ಸಾಹುಕಾರ ವ್ಯರ್ಥ

ತನುಜರು ಇಲ್ಲದ ಮಂದಿರ ವ್ಯರ್ಥ

ಹಣ ವಿಷ್ಣು ದ್ರೋಹಿಗೆ ಕೊಟ್ಟದ್ದು ವ್ಯರ್ಥ

ಗುಣಹೀನ ಸಂನ್ಯಾಸಿಗೆ ವಂದನೆ ವ್ಯರ್ಥ

ಘನ ಘರ್ಜಿಸಿದರೇನು ಮಳೆ ಇಲ್ಲ ವ್ಯರ್ಥ

ಅನಳನು ಧೂಮಯುಕ್ತವಾಗೆ ವ್ಯರ್ಥ

ಅನಿಮಿಷರಿಗೆ ಮಂತ್ರಹೀನಾಹುತಿಯು ವ್ಯರ್ಥ

ವನಿತೆಗೆ ಗಂಡ ಅಂತರಿಸಲು ವ್ಯರ್ಥ

ಮನೆತನದಳಿಯನಾಗುವುದಂತು ಬಲು ವ್ಯರ್ಥ

ವನಜರಹಿತವಾದ ಕಾಸಾರವು ವ್ಯರ್ಥ

ಅನುವಾಗದ ಮದಹೀನಗಜವಾದರು ವ್ಯರ್ಥ

ಕುಣಿಯದ ಹಾರದ ಕುದುರೆ ಇದ್ದೂ ವ್ಯರ್ಥ

ಸನುಮತ ಸ್ವರಹೀನ ವೇದಪಾಠ ವ್ಯರ್ಥ

ತೃಣಕಂಠಕಯುಕ್ತ ಮಾರ್ಗವಾದರೂ ವ್ಯರ್ಥ

ಮನಸು ಸಮಹೀನವಾದ ಜ್ಞಾನ ವ್ಯರ್ಥ

ಕನಸು ಕಾಸೆಂಬುದು ಸುಳ್ಳು ಖ್ಯಾತಿ ವ್ಯರ್ಥ

ಒಣಡಂಭಕವಾದ ದಾನ ಧರ್ಮ ವ್ಯರ್ಥ

ಮನಸಿಜಪಿತ ಶ್ರೀಪ್ರಾಣೇಶವಿಟ್ಠಲನಂಘ್ರಿ -

ಯನು ಸೇವಿಸದೆ ಬಂದ ಮನುಜ ಜನ್ಮವು ವ್ಯರ್ಥ ll - ಶ್ರೀಪ್ರಾಣೇಶದಾಸರು

***

 ವ್ಯರ್ಥವಾಗದಿರಲಿ

ಶ್ರೀಪ್ರಾಣೇಶದಾಸರು ಸಾರ್ಥಕ ಜೀವನವನ್ನು ಸಾಗಿಸುವವರು ಹೇಗಿರಬೇಕೆಂಬ ಅಂಶಗಳನ್ನು ನಿಷೇದಾರ್ಥಕ ರೀತಿಯಲ್ಲಿ ತಿಳಿಸಿ, ಜೊತೆಗೆ ಇತರ ವಸ್ತುಗಳೂ ಎಂಥಹ ಸಂದರ್ಭದಲ್ಲಿ ವ್ಯರ್ಥವೆನ್ನಿಸುತ್ತದೆಂದು ತಿಳಿಸುವರು.  ಸಾಧನೆಗೆ ಸಿಗುವ ಫಲ  ಅವುಗಳ ಸಾರ್ಥಕ್ಯವನ್ನವಲಂಬಿಸಿರುತ್ತದೆ.

ಬಹು ಬಹುಕೋಟಿ ಜನುಮಗಳಿಗೆ ಲಭಿಸಿದ ಈ ಮನುಷ್ಯ ಜನುಮ, ಅದರಲ್ಲೂ ಶ್ರೀಮದಾಚಾರ್ಯರ ಅನುಯಾಯಿಯಾದದ್ದು ಮಹಾಭಾಗ್ಯ.  ಇಂತಹ ದುರ್ಲಭ ಜನುಮ ಸಿಕ್ಕಾಗ ಯಾವ ವ್ಯರ್ಥವಾದ ಕಾರ್ಯವೂ ನಮ್ಮಿಂದೆಸಗದಿರಲು ಇಲ್ಲಿ ದಾಸರು ಅನೇಕ ವಿಷಯಗಳನ್ನು ಮುಂದಿಟ್ಟರು.  ಜೀವನದ ಪ್ರತಿ ಪ್ರಸಂಗಗಳಲ್ಲೂ ಗಮನವಿಟ್ಟು ಕಾರ್ಯೋನ್ಮುಖರಾಗಿ ಸಿದ್ಧಿಯನ್ನು ಪಡೆಯಿರೆಂದರು.  ವ್ಯರ್ಥವೆಂದರೆ ನಿರಂತರ ಕಳೆಯಿತೆಂದೇ ಅರ್ಥ.  ಮತ್ತೆ ಬಾರದು, ಸಿಗದು.  ಆದ್ದರಿಂದ ಎಂದಿಗೂ ನಮ್ಮ ಕಾರ್ಯವು ವ್ಯರ್ಥವಾಗದಂತೆ ಗಮನಹರಿಸಿರೆಂದು ಆದೇಶವಿತ್ತರು. 

***