ತಾರಮ್ಮ ಶ್ರೀ ರಂಗಧಾಮನ ತಂದು ತೋರಮ್ಮ ankita helavana katte TAARAMMA SRI RANGADHAAMANA TANDU TORAMMA

ತಾರಮ್ಮ ಶ್ರೀ ರಂಗಧಾಮನ ತಂದು

ತೋರಮ್ಮ ಎನ್ನಯ ಪ್ರೇಮನ

ವಾರಿಜಸಖಶತಕೋಟಿತೇಜನ ಹೊಂತ-

ಕಾರಿಯ ನೀ ಕರತಾರೆ ಸೈರಿಸಲಾರೆ     ಪ.

ವೃಂದಾವನದೊಳಗಾಡುವ ಶ್ರೀ-

ಗಂಧವ ಮೈಯೊಳು ತೀಡುವ

ಚಂದದಿ ಕೊಳಲೂದಿ ಪಾಡುವ ನಮ್ಮ

ಕಂದರ್ಪ ಜಲಕ್ರೀಡೆಯಾಡುವ

ನಂದ ನಂದನ ಗೋವಿಂದನ ಕಾಣದೆ

ಒಂದು ನಿಮಿಷ ಯುಗವಾಗಿ ತೋರುತಲಿದೆ 1

ಉಡುವ ಸೀರೆಯ ಸೆಳೆದೋಡುವ ದೊಡ್ಡ

ಕಡಹದ ಮರವೇರಿ ನೋಡುವ

ಕೊಡಲೊಲ್ಲದೆ ಬಹುಕಾಡುವ ಲಜ್ಜೆ-

ಗೆಡಿಸಿ ಮಾನಿನಿಯರ ಕೂಡುವ

ತಡವ್ಯಾತಕ್ಕೆ ಸಖಿ ತವಕದಿಂದಲಿ ಪೋಗಿ ಎ-

ನ್ನೊಡೆಯನ ಕರತಾರೆ ಅಡಿಗೆರಗುವೆ ನಾ 2

ನೀಲವರ್ಣನ ನಿಜರೂಪನ ಶ್ರೀ-

ಲೋಲ ಹೆಳವನಕಟ್ಟೆವಾಸನ

ಜಾಲಿ ಹಾಳ ವೆಂಕಟೇಶನ ಭಕ್ತ-

ಪಾಲಕ ಪರಮವಿಪೋಷನ

ಆಲಸ್ಯವ್ಯಾಕೆನ್ನ ಇನಿಯನ ಕರೆತಾರೆ

ಬಾಲೆ ನಿನಗೆ ಕಂಠಮಾಲೆಯ ಕೊಡುವೆ. 3

***