sudheendra teertha rayara mutt yati stutih
ರಚನೆ : ಶ್ರೀ ಪ್ರಸನ್ನ ಶ್ರೀನಿವಾಸ ದಾಸರು
ರಾಗ : ಸಾವೇರಿ ತಾಳ : ಆದಿ
ಶ್ರೀ ಸುಧೀಂದ್ರತೀರ್ಥ
ಯತಿರಾಜ ಚರಣ ।
ಬಿಸಜ ದ್ವಂದ್ವದಲಿ
ನಾ ಶರಣಾದೆ ಸತತ ।
ಅಸಮ ಗುಣವಾರಿನಿಧಿ
ಶ್ರೀ ರಾಮಚಂದ್ರ ।
ವ್ಯಾಸ ನರಹರಿ
ಕೃಷ್ಣಸೈಂಧವಾಸ್ಯ ಪ್ರಿಯ ।। ಪಲ್ಲವಿ ।।
ಅಶೇಷ ಗುಣಸಿಂಧು
ಶ್ರೀ ರಮಣ ಹಂಸನಿಗೆ ।
ಬಿಜಸ ಭವ ಸನಕಾದಿ
ಗುರು ಪರಂಪರೆಗೆ ।
ದಶ ಪ್ರಮತಿ ಪಾದಾಂಬುಜ
ಯುಗ್ಮಕೆ ಮನಸಾ ।
ನ ಸದಾ ಸನ್ನಮಿಸಿ
ಶರಣಾದೆ ಮುದದಿ ।। ಚರಣ ।।
ಅರವಿಂದನಾಭ ನರಹರಿ
ಮಾಧವತೀರ್ಥ ।
ಸೂರಿಕುಲ ತಿಲಕ
ಅಕ್ಷೋಭ್ಯ ಜಯತೀರ್ಥ ।
ಪರ ವಿದ್ಯಾ ಕುಶಲ
ಶ್ರೀ ವಿದ್ಯಾಧಿರಾಜೇಂದ್ರ ।
ಚರಣಂಗಳಲಿ
ಶರಣು ಶರಣಾದೆ ।। ಚರಣ ।।
ಕೋವಿದ ಶಿರೋಮಣಿ
ಕವೀಂದ್ರ ವಾಗೀಶರು ।
ಭಾವುಕಾಗ್ರಣಿ ರಾಮಚಂದ್ರ
ವಿಬುಧೇಂದ್ರ ।
ದೇವ ಹರಿಪ್ರಿಯ
ಜಿತಾಮಿತ್ರ ರಘುನಂದನ ।
ದೇವಿ ತುಳಸೀಪತಿ
ಒಲಿದಿಹ ಸುರೇಂದ್ರ ।। ಚರಣ ।।
ಈ ಸರ್ವ ಗುರುಗಳ
ಚರಣ ಕಮಲಗಳಲ್ಲಿ ।
ನಾ ಸರ್ವದಾ ಶರಣು
ಶರಣೆಂಬೆ ಮುದದಿ ।
ಶ್ರೀ ವ್ಯಾಸಮುನಿ ಮಿತ್ರ
ಶ್ರೀ ಸುರೇಂದ್ರರ । ಕರಸ ।
ರಸಿಜಜ ಶ್ರೀ ವಿಜಯೀಂದ್ರರಿಗೆ
ನಮಿಪೆ ।। ಚರಣ ।।
ತೋಯಜೇಕ್ಷನ ನಾರಾಯಣ
ಲಕ್ಷ್ಮೀಗೆ ಮುಖ್ಯ ।
ವಾಯುಗೆ ಭಾರತಿಗೆ
ಪ್ರಿಯತಮರು ।
ಜಯಶೀಲ ವಿಜಯೀಂದ್ರತೀರ್ಥರ
ಕರದಿಂದ । ಅಭ್ಯು ।
ದಯವಾದರು ಸುಧೀಂದ್ರ
ಯತಿವರರು ।। ಚರಣ ।।
ಬುದ್ಧಿ ತೀಕ್ಷಣ್ಯಯುತ
ಉದ್ಧಾಮ ಪಾಂಡಿತ್ಯ ।
ಮಾಧವ ಮಧ್ವಾನುಗ್ರಹ
ಪಾತ್ರತ್ವ ।
ಶ್ರೀದನಪರೋಕ್ಷ
ಯೋಗ್ಯತೆಯನ್ನ ಕಂಡು ।
ಸುಧೀಂದ್ರ ನಾಮವನು
ಇತ್ತರು ಗುರುಗಳು ।। ಚರಣ ।।
ಶ್ರೀ ವಿಜಯೀಂದ್ರರನುಗ್ರಹ
ಪೂರ್ಣ ಪಾತ್ರರು ।
ದೇವಾಂಶರು ಶ್ರೀ
ಸುಧೀಂದ್ರ ಯತಿಯು ।
ದಿಗ್ವಿಜಯದಲಿ ಇವರ
ಮಹಿಮೆಗಳ ಕಂಡು ।
ಸರ್ವರು ಎಲ್ಲೆಲ್ಲು
ಮಾಡಿದರು ಮರ್ಯಾದೆ ।। ಚರಣ ।।
ಸುಭದ್ರಾ ಪರಿಣಯದ
ಸೊಬಗು ರಸತರವು ।
ಈ ಭಾರಿ ಕವಿಗಳ
ಸಾಮರ್ಥ್ಯ ಯೇನೆಂಬೆ ।
ಗಂಭೀರ ಧಾಟಿಯಲಿ
ವ್ಯಾಸರಾಜಾಭ್ಯುದಯ ।
ಸದ್ಭಕ್ತಿ ವೈರಾಗ್ಯ
ಬೋಧಿಪ ಗ್ರಂಥಗಳು ।। ಚರಣ ।।
ವ್ಯಾಖ್ಯಾನ ಮಾಡಿದರು
ಶ್ರೀ ಭಾಗವತದ ।
ಏಕಾದಶ ಸ್ಕಂದ
ದ್ವಿತೀಯ ಸ್ಕಂದ ।
ತರ್ಕ ತಾಂಡವಕೆ
ವ್ಯಾಖ್ಯಾನ ಇನ್ನು ಬಹು । ಅ ।
ಲಂಕಾರಮಂಜರಿಯಾದಿ
ಗ್ರಂಥಗಳು ।। ಚರಣ ।।
ಸುಧೀಂದ್ರ ಗುರುಗಳಲಿ
ಪಾಠ ಓದುವುದಕ್ಕೆ ।
ಬಂದಿದ್ದರು ವೇಂಕಟ-
ನಾಥಾಚಾರ್ಯ ।
ಸಾಧು ಧೀಮಂತರು
ವಿನಯ ಸಂಪನ್ನರು ।
ಶ್ರೀದನಿಗೆ ಪ್ರಿಯತಮ
ಭಕ್ತ ವಿಜ್ಞಾನಿ ।। ಚರಣ ।।
ರಾಘವನ ಪ್ರೇರಣೆಯಿಂ
ಸಂನ್ಯಾಸವನಿತ್ತು ।
ರಾಘವೇಂದ್ರತೀರ್ಥಾಖ್ಯ
ನಾಮವ ಕೊಟ್ಟು ।
ಮುಖ್ಯ ವಿದ್ವಜ್ಜನ
ಭೂಪಾಲರ ಮುಂದೆ ।
ಶಂಖದಿ ಸುಧೀಂದ್ರರಭಿಷೇಕ
ಮಾಡಿದರು ।। ಚರಣ ।।
ತುಂಗಾ ತೀರದಲ್ಲಿ
ವೃಂದಾವನಗಳು ।
ಪಂಕಜನಾಭರು
ಜಯತೀರ್ಥ ಕವೀಂದ್ರ ।
ವಾಗೀಶರು
ವ್ಯಾಸರಾಯರು ಇಹರು ।
ತಾಕುಳಿತರಲ್ಲೇವೆ
ಶ್ರೀ ಸುಧೀಂದ್ರಾರ್ಯ ।। ಚರಣ ।।
ಫಾಲ್ಗುಣ ಕೃಷ್ಣ
ದ್ವಿತೀಯಾ ಪುಣ್ಯದಿನ ।
ಳಾಳುಕನ ಸ್ಮರಿಸುತ
ಹರಿಪುರ ಐದಿ ।
ಇಲ್ಲಿ ವೃಂದಾವನದಿ
ಒಂದಂಶದಿ ಇಹರು ।
ಬಲು ಭಕ್ತಿಯಿಂ ನೆನೆಯೆ
ಒದಗುವರು ಬಂದು ।। ಚರಣ ।।
ಪದುಮಭವಪಿತ
ಶ್ರೀ ಪದುಮಾಲಯಪತಿ ।
ನಿರ್ದೋಷ ಗುಣನಿಧಿ
ಪ್ರಸನ್ನ ಶ್ರೀನಿವಾಸ ।
ಯದುಪತಿಗೆ ಪ್ರಿಯತಮ
ಸುಧೀಂದ್ರ ಗುರುವರ ನಿಮ್ಮ ।
ಪದುಮಾಂಘ್ರಿ ಯುಗ್ಮದಲಿ
ಶರಣು ಮಾಂ ಪಾಹಿ ।। ಚರಣ ।।
****
No comments:
Post a Comment