ಕುಂತ್ರೆ ನಿಂತ್ರೆ ಡಾಕ್ಟರ್ ಹತ್ರೆ ಓಡ ಬ್ಯಾಡ್ರೋ home remedy for ill health ಮನೆ ಮದ್ದು

 * ಮನೆ ಮದ್ದು *

ಕುಂತ್ರೆ ನಿಂತ್ರೆ ಡಾಕ್ಟರ್ ಹತ್ರೆ ಓಡ ಬ್ಯಾಡ್ರೋ

ಮನೆಮದ್ದು ಅಂಗೈಲಿದ್ರೆ ‌ಚಿಂತೆಯಾಕ್ರೋ ll

ನೆಗಡಿ ಶೀತ ಕೆಮ್ಮು ಆದ್ರೆ ನಡುಗ ಬ್ಯಾಡ್ರೋ

ದೊಡ್ಡಪತ್ರೆ ಜೇನುತುಪ್ಪ ಕುಡಿದು ನೋಡ್ರೋ

 ||೧||

ಹೊಟ್ಟೆಬಾಧೆ ಬಂದದ್ದಾದ್ರೆ ಹೆದರಬ್ಯಾಡ್ರೋ

ಆಗೊಮ್ಮೆ ಈಗೊಮ್ಮೆ ಜೀರಿಗೆ ಕಷಾಯ ಕುಡ್ದು ನೋಡ್ರೋ

||೨||

ಕಫಕ್ಕೇನು ಮದ್ದಿಲ್ವೆ? ಕೇಳ ಬ್ಯಾಡ್ರೋ

ಕಾಳ್ಮೆಣ್ಸು-ಶುಂಠಿ ಕಷಾಯ ಇಲ್ವೇನು ತಿಳ್ದು ನೋಡ್ರೋ 

||೩||

ಬಹಳವೇನು ಬಾಯಾರಿಕೆಯೇ ಏನು ಗೋಳ್ರೋ

ತುಳಸಿ ಎಲೆಯ ಸೇವ್ನೆ ಮಾಡಿ ಆಮೇಲ್ಹೇಳ್ರೋ ||೪||

ಬಾಯಾರಿಕೆಯೇ ಇಲ್ಲವೆಂದು ಮರುಗಬ್ಯಾಡ್ರೋ

ಬೆಲ್ಲವನ್ನು ಸವಿಯುತ್ತ ಸುಧಾರ್ಸಿಕೊಳ್ರೋ ||೫||

ಪಿತ್ತವಾದ್ರೆ ಚಹಾ ಸೇವನೆ ಬಿಟ್ಟುಬಿಡ್ರೋ

ಉಷ್ಣವಾದ್ರೆ ಕಾಫಿ ಕುಡಿಯೋದ್ ಬಂದುಮಾಡ್ರೋ 

||೬||

ಬಹುಮೂತ್ರಕೆ ದಾಲ್ಚಿನ್ನಿಯ ಮದ್ದು ಸರಳ ಕಣ್ರೋ

ಮೂತ್ರ ತಡೆಗೆ ಮತ್ತೆ ಜೀರ್ಗೆ ಕಷಾಯ ಮಾಡ್ರೋ ||೭||

ಮಧುಮೇಹಕ್ಕೆ ರಾಗಿ ಮುದ್ದೆ ಮೆದ್ದು ನೋಡ್ರೋ

ಮೂಲವ್ಯಾಧಿಗೆ  ಎಳ್ಳು ಸೇವ್ನೆ (ನಿತ್ಯ) ಬಿಡ ಬ್ಯಾಡ್ರೋ 

||೮||

ವಾಂತಿಯಾದ್ರೆ ಎಳ್ನೀರ್-ಐತೆ ಹೆದರ ಬ್ಯಾಡ್ರೋ

ಭೇದಿ ಆದ್ರೆ ಅನ್ನ ಮಜ್ಜಿಗೆ ಊಟ ಮಾಡ್ರೋ ||೯||

ಹಲ್ಲು ಸಡಿಲತೆಗೆ ದಾಳಿಂಬೆ ಸಿಪ್ಪೆಯ ಕಷಾಯ ಕೊಡ್ರೋ

ಮೊಸರು ತಿಂದು ಕಾಮಾಲೆ ರೋಗವ ದೂರವಿಡ್ರೋ 

 ||೧೦||

ತುಟಿ ಸೀಳಿದಿಯೇ? ಹಾಲಿನ ಕೆನೆಯ ಹಚ್ಚಿ ನೋಡ್ರೋ

ತೆಳ್ಳಗಾಗಲು ಬಿಸಿ ನೀರ್ ಕುಡಿವುಪಚಾರವ ಮಾಡ್ರೋ  ||೧೧||

ರಕ್ತ ಹೀನತೆಗೆ ಪಾಲಕ್ ಸೊಪ್ಪು ಇಲ್ಲಿದೆ ಕಾಣ್ರೋ

ಹೊಟ್ಟೆಯ ಹರಳಿಗೆ ಬಾಳೆದಿಂಡಿನ ಪಲ್ಯವ ತಿನ್ರೋ 

||೧೨||

ತಲೆ ಸುತ್ತುವುದಕೆ ಬೆಳ್ಳುಳ್ಳಿ ತಿನ್ನುತ

ಗುಣಮುಖರಾಗ್ರೋ

ರಕ್ತ ದೋಷಕೆ ಕೇಸರಿ ಹಾಲಿನ ಸವಿ-ಸುಖ ನೀಡ್ರೋ 

||೧೩||

ಓಂ ಕಾಳಲಿದೆ ಹಸಿವೆ ಮಾಡುವ ಶಕ್ತಿಯ ಕಾಣ್ರೋ

ನೀಗದ ಹಸಿವೆಗೆ ಹಸಿ ಹಸಿ ಶೇಂಗಾ ಚಮತ್ಕಾರ ನೋಡ್ರೋ ||೧೪||

ಮಲೆನಾಡಿನ ಮಲೆ ಮಡಿಲಿನ ಮದ್ದಿನ ಮಹಿಮೆಯ ಪಾಡ್ರೋ

ಭಾಗ್ಯದ ಆರೋಗ್ಯದ  ಬುನಾದಿಯಿದು ಮೂಗ-ಮುರಿಯಬ್ಯಾಡ್ರೋ

||೧೫||

ವಿಷಮ ಸಂದರ್ಭಕೆ ರಾಮ ಬಾಣವು ಮನೆ ಮದ್ದದು

ನೋಡ್ರೋ

ದಿವ್ಯೌಷಧಗಳ ಜ್ಞಾನಭಂಡಾರಕೆ ನಮೋನಮನ ಹಾಡ್ರೋ ||೧೬||

*******