ವೆಂಕಟೇಶನೆ ಚಕ್ರ vijaya vittala ankita suladi ವೆಂಕಟೇಶ ಸ್ತೋತ್ರ ಸುಳಾದಿ VENKATESHANE CHAKRA VENKATESHA STOTRA SULADI

Audio by Mrs. Nandini Sripad

ಶ್ರೀ ವಿಜಯದಾಸಾರ್ಯ ವಿರಚಿತ  ಶ್ರೀ ವೆಂಕಟೇಶ ಸ್ತೋತ್ರ ಸುಳಾದಿ 

 ರಾಗ ನಾಟಿ 

 ಧ್ರುವತಾಳ 

ವೆಂಕಟೇಶನೆ ಚಕ್ರ ಶಂಖ ಕೌಮೋದಕಿ 
ಪಂಕಜಾಂಕಿತನೆ ಮೀನಾಂಕನ ಪಿತನೆ ಭ -
ಯಂಕರ ದೈತ್ಯರ ಬಿಂಕವ ತರಿದಕ -
ಳಂಕ ಮಹಿಮ ನಿಶ್ಯಂಕ ಪುಣ್ಯನಾಮ 
ಪಂಕಜಭವನಾಗಾ ಕಂಕಣನುತ ಪಾದಾ 
ಪಂಕಜ ಶಿರಿವತ್ಸಾಂಕಿತ ಫಣಿ ಪರಿ -
ಯಂಕನೇ ಲಂಕೇಶ ಪೋಷಾ ವೆಂಕಟದೀಶಾ 
ಸಂಕಟಹರ ಸುರಲಂಕೃತ ಮನೋಹರ 
ಟಂಕಿನೆ ನಾಮದೇವಾ ವಿಜಯವಿಠಲ ಯನ್ನ 
ಸೋಂಕಿ ಸಂಸಾರದ ಶೃಂಖಳ ಪರಿಹರಿಸೊ ॥ 1 ॥

 ಮಟ್ಟತಾಳ 

ನಿರಾಧಾರ ನಿಸ್ಸಂಗ ನಿರಮಲಾಂಗ 
ನಿರಾಮಯ ನಿರ್ದೋಷ ನೀರದಭಾಸ
ನಿರಂಜನ ನಿರ್ಗುಣ ನಿರಾವರಣ 
ನೀರಜರಮಣಾ ನಿರಾಶ್ರಯನೆ ನಿರ್ವಿಕಲ್ಪ 
ನಿರ್ವಿಕಾರಾ ವಿಜಯವಿಠಲ 
ತಿರುವೆಂಗಳೇಶ ತಿರುಪತಿವಾಸ ॥ 2 ॥

 ತ್ರಿವಿಡಿತಾಳ 

ಮಂಗಳ ಮಹಿಮ ತಿರುವೆಂಗಳನಾಥ 
ಸುರಂಗಳ ಪಾಲಾ ಜನಂಗಳ ವೊಡಿಯಾ 
ಹೆಂಗಳೆಯರ ವಸನಂಗಳಾ ಕದ್ದು ಸು -
ಖಂಗಳಾ ತೋರಿಸಿದ ದಿಕ್ಕಂಗಳೊಳಗೆ 
ತಿಂಗಳಾನಂದದಲಿ ಕಂಗಳಿಗೆ ನಿನ್ನ ಪಾ -
ದಂಗಳ ತೋರು ನಾಮಂಗಳ ಉಣಿಸುತ 
ಮಂಗಳಕಾಯ ಸಿರಿ  ವಿಜಯವಿಠಲ ಹೃದ -
ಯಂಗಳ ಮಧ್ಯ ರೂಪಂಗಳ ನೆಸಗುತಾ ॥ 3 ॥

 ಅಟ್ಟತಾಳ 

ನಾರಾಯಣ ಕೃಷ್ಣ ಅಚ್ಯುತಾನಂತ 
ಘೋರದುರಿತ ಸಂಹಾರ ನಾನಾಕವ -
ತಾರಲಕುಮಿ ರಮಣಾಪತ್ತು ನಾಶನಾ 
ಚಾರು ಚರಿತ್ರ ಮುನಿಸ್ತೋತ್ರ ಪಾತ್ರಾ 
ಕಾರುಣ್ಯ ನಿಧಿ ತಿಮ್ಮ ವಿಜಯವಿಠಲ ಭವ -
ತಾರಕ ವರಗಿರಿ ವಾಸ ತಿರುಪತೀಶಾ ॥ 4 ॥

 ಆದಿತಾಳ 

ತಿರುಗುವಂತೆ ಮಾಡು ಮನಸು 
ಕರಗುವಂತೆ ಮಾಡು ಮನಸು 
ಮಿರಗುವಂತೆ ಮಾಡು ಮನಸು 
ಸೊರಗುವಂತೆ ಮಾಡು ಮನಸು 
ಸುರಳಿತವಾಗಿ ಈ ಪರಿಯಲ್ಲಿ ಧರ್ಮಗತಿಗೆ 
ತಿರುವೆಂಗಳೇಶ ನಮ್ಮ ವಿಜಯವಿಠಲ ಮೇಲ್
ಗಿರಿಯವಾಸ ಸಿರಿ ವೆಂಕಟೇಶ ಮಹಾಮಹಿಮಾ ॥ 5 ॥

 ಜತೆ 

ಧರೆಯೊಳು ಮೆರೆವ ಸಿರಿ ತಿರುವೆಂಗಳಪ್ಪ 
ತಿರುಮಲ ವಿಜಯವಿಠಲ ಜಗನ್ಮೋಹನ ॥
********