ಇಂದ್ರಲೋಕವ ಪೋಲ್ವ ದ್ವಾರಕೆ ankita hayavadana ಉಡುಪಿ ಕೃಷ್ಣ ವೈಭವ INDRA LOKAVA POLVA DWARAKE UDUPI KRISHNA VAIBHAVA

Audio by Vidwan Sumukh Moudgalya

ಶ್ರೀ ವಾದಿರಾಜ ಗುರುಸಾರ್ವಭೌಮ ವಿರಚಿತ ಉಡುಪಿ ಶ್ರೀಕೃಷ್ಣ ವೈಭವ 

 ರಾಗ ಆರಭಿ              ಮಿಶ್ರಛಾಪುತಾಳ 

 ಭಾಮಿನಿ ಷಟ್ಪದಿ 

ಇಂದ್ರಲೋಕವ ಪೋಲ್ವ ದ್ವಾರಕೆ ।
ಯಿಂದ ನಮ್ಮನು ಸಲಹಲೋಸುಗ ।
ಸಿಂಧುವಿನ ಮಾರ್ಗದಲಿ ತೌಳವ ಜನರ ದೇಶಕ್ಕೆ ।
ಬಂದು ಮಧ್ವಾಚಾರ್ಯರಾ ಕೈ -
ಯಿಂದ ಪೂಜೆಯಗೊಂಬ ಕೃಷ್ಣನ ।
ಮಂದಹಾಸದ ಮುದ್ದುಮೊಗ ಸೇವಿಪಗೆ ಸಂಪದವು ॥ 1 ॥

ಒಂದು ಕರದಲಿ ನೇಣಸಿರಿ ಮ - ।
ತ್ತೊಂದರಲಿ ಕಡೆಗೋಲು ವರಮಣಿ ।
ಯಿಂದ ಶೋಭಿಪ ನಾಭಿ ವಕ್ಷ ತಾವರೆ ಕಿರಿಡೊಳ್ಳು ।
ಚಂದ್ರನಂದದಿ ವದನ ಸಮದಲಿ ।
ನಿಂದ ಪಾದ ಮನೋಹರ ಮುರು ।
ದ್ವಂದ್ವ ಶ್ರೀಕೃಷ್ಣನ ಮೂರ್ತಿಯ ನೋಳ್ಪರ ನಯನ ಸುಕೃತಫಲ ॥ 2 ॥

ನಿತ್ಯದಲಿ ಗೋಘೃತದ ಮಜ್ಜನ ।
ಮತ್ತೆ ಸೂಕ್ತ ಸ್ನಾನ ತದನು ಪ - ।
ವಿತ್ರ ಮಂತ್ರ ವಿಚಿತ್ರ ತರವಹ ಕಲಶದಭಿಷೇಕ ।
ವಸ್ತ್ರಗಂಧ ವಿಭೂಷಣಂಗಳ ।
ವಿಸ್ತರಿಪ ಶ್ರೀತುಲಸಿ ಪುಷ್ಪದಿ ।
ಭಕ್ತಿಭರಿತರು ಮಾಡುವಾರಾಧನೆಯನೇನೆಂಬೆ ॥ 3 ॥

ಸುತ್ತ ಸುಪ್ತಾವರಣದರ್ಚನೆ ।
ವಿಸ್ತರಿಪ ಸ್ತೋತ್ರಗಳ ಗಾನ ವಿ - ।
ಚಿತ್ರ ನೈವೇದ್ಯವು ಸುವೀಳೆಯ ಧೂಪ ದೀಪಗಳು ।
ರತ್ನದಾರುತಿಗಳ ಸಂಭ್ರಮಾ ।
ಛತ್ರ ಚಾಮರ ನೃತ್ಯಗೀತಾ - ।
ದ್ಯುತ್ಸವಗಳೊಪ್ಪಿಹ ದೇವನ ಮುಂದೆ ದಿನದಿನದಿ ॥ 4 ॥

ಅಪ್ಪ ಮೊದಲಾದಮಲ ಭಕ್ಷ್ಯವ ।
ತುಪ್ಪ ಬೆರೆಸಿದ ಪಾಯಸವ ಸವಿ - ।
ದೊಳ್ಪ ಶಾಕಗುಡಗಳನು ಕಂದರ್ಪನಪ್ಪನಿಗೆ ।
ಅರ್ಪಿಸುವರನುದಿನದಿ ರಸ ಕೂ - ।
ಡಿಪ್ಪ ಪಕ್ವಫಲಾದಿಗಳು ರಮೆ ।
ಯಪ್ಪಿಕೊಂಬಿರ್ಪ್ಪಚ್ಯುತಗೆ ಪೂಜಿಸುವ ಯೋಗಿಗಳು ॥ 5 ॥

ಮೆರೆವ ದೀಪ ಸಹಸ್ರ ಅಚ್ಯುತ - ।
ನೆರಡು ಭಾಗದೊಳಿಂದ್ರ ನೀಲ ।
ಸ್ಫುರದಮಲ ಮಣಿಗಳಂತಪ್ಪಿಹ ವೊಪ್ಪಿಹವು ।
ದುರಿತರಾಶಿಗಳವನ ಸೇವಾ ।
ನಿರತ ಸುಜನರ ತನುಮನಂಗಳ ।
ತೊರದಿಹುದು ಸಿರಿನೆಲಸಿಹನು ಶ್ರೀಕೃಷ್ಣನ ಮನೆ ಶೃಂಗಾರ ॥ 6 ॥

ತೊಟ್ಟ ಭೂಷಣವಿಟ್ಟ ಮಕುಟವ - ।
ನುಟ್ಟ ಪಟ್ಟೆಯ ಮುಟ್ಟಿ ತ್ರಿಗುಣವ ।
ಬಿಟ್ಟ ದುರಿತವ ಕೊಟ್ಟ ನೀ ಶುಭ ವಾಕ್ಯಗಳ ನಮಗೆ ।
ನಿಷ್ಠ ಸುಜನರು ತಟ್ಟನೆ ಮನ - ।
ಮುಟ್ಟಿ ನೆನೆವರಿಗಿಷ್ಟ ಅಖಿಳವ ।
ಕೊಟ್ಟು ಸಲಹದೆ ಸೃಷ್ಟಿಯೊಳು ನೀನಿಷ್ಟೊ ಗುಣಪುಷ್ಪ ॥ 7 ॥

ಏನನೆಂಬೆನು ಕೃಷ್ಣ ದೀನರ ದೊರೆಯು ।
ನೀನೆಂದಾದ ಕಾರಣ ।
ಮಾನವರ ಸುರಧೇನುತನ ನಿನಗಿಂದು ಸೇರಿತಲ ।
ಹೀನತೆಯ ಪರಿಹರಿಸಿ ಭಾಗ್ಯಾಂ ।
ಭೋ ನಿಧಿಯೆ ನಿಜರ್ಗೀವ ನಿನ್ನ ಮ - ।
ಹಾನುಭಾವದ ಬಲುಮೆಗೆಣೆಗಾಣೆನು ಮಹಾಪ್ರಭುವೆ ॥ 8 ॥

ಭಾಪು ದಿವಿಜರ ದೇವರಾಯನೆ ।
ಭಾಪು ಭಜಕರಭೀಷ್ಟವೀವನೆ ।
ಭಾಪು ಹರಿನೀಲೋತ್ಪಲನೆ ಶ್ಯಾಮಲನೆ ಕೋಮಲನೆ ।
ಭಾಪು ಹಯವದನಾ ಖಿಲೇಶನೆ ।
ಭಾಪು ಸುಜನರ ಪಾಪ ನಾಶನ ।
ಭಾಪು ಕೃಷ್ಣಾಲಸ ತ್ರೈಪಾಲಕನೆ ಬಾಲಕನೆ ॥ 9 ॥
*********