ಶ್ರೀನಾಥ ಪಾರ್ವತೀ ನಾಥ ಶರಣೆಂಬೆ |
ವಾಣಿ ಭಾರತೀ ಗಜಮುಖನ ಬಲಗೊಂಬೆ ||
ನಾನು ಬಲ್ಲಷ್ಟು ಹೇಳುವೆನು ಈ ಕಥೆಯ |
ಶ್ರೀನಾಥ ಗಜರಾಜಗೊಲಿದ ಸಂಗತಿಯ || ೧ ||
ಛಪ್ಪನ್ನ ದೇಶದ ರಾಜರುಗಳೊಳಗೆ |
ಉತ್ತಮದ ದೇಶ ಗೌಳದೇಶದಲಿ||
ವಿಷ್ಣು ಭಕ್ತರೊಳು ಇಂದ್ರದ್ಯುಮ್ನ ನೃಪನು |
ಮತ್ತೆ ಭೂಸುರರ ಪಾಲಿಸುತ್ತಿದ್ದ ತಾನು || ೨ ||
ಚಿತ್ತದಲಿ ನರಹರಿಯ ನೆನೆದು ಚಿಂತಿಸುತ |
ಪುತ್ರಮಿತ್ರಾದಿ ಬಂಧುಗಳ ವರ್ಜಿಸುತ ||
ಸರ್ಪಶಯನನ ಧ್ಯಾನದೊಳಿದ್ದ ತಾನು |
ಮತ್ತೆ ತ್ರಿಕೊಟ ಪರ್ವತಕಾಗಿ ಬಂದ ||೩||
ಧ್ಯಾನದಲಿ ನರಹರಿಯ ನೆನೆದು ಚಿಂತಿಸುತ |
ಆನೆಕುದುರೆ ರಾಜ್ಯಗಳ ತ್ಯಜಿಸುತ್ತ ||
ನಾಗಶಯನನ ಧ್ಯಾನದೊಳಿದ್ದ ತಾನು |
ಮೇರುಮಂದರದ ಸಮೀಪಕ್ಕೆ ಬಂದ ||೪ ||
ಸಿದ್ದ ಕಿನ್ನರರು ಗಂಧರ್ವರಿಗೆ ಸ್ಥಾನ |
ಎದ್ದೆದ್ದು ಕುಣಿವ ಖಗಮೃಗಗಳ ನಿಸ್ಸೀಮ ||
ಎತ್ತ ನೋಡಲು ನಾಲ್ಕು ದೇಶಗಳ ವಿಸ್ತೀರ್ಣ |
ಸುತ್ತ ಸುವರ್ಣಮಯ ವಸ್ತುಗಳ ಧಾಮ || ೫ ||
ಹಲವು ನದಿ ಹಲವು ಕೊಳ ಹಲವು ಸರೋವರದಿ |
ಹಲವು ಪರಿ ಪುಷ್ಪಗಳು ನಲಿವ ಅಳಿಕುಲದಿ ||
ಕುಣಿವ ನವಿಲು ಗಿಳಿ ಕೋಗಿಲೆಗಳ ಗಾನ |
ಚೆಲುವ ಗಂಧರ್ವ ಕಿನ್ನರರಿಗೆ ಸ್ಥಾನ || ೬ ||
ಬಂದು ನದಿಯಲ್ಲಿ ಸ್ನಾನವನು ಮಾಡಿ |
ಛಂದಕಿಕ್ಕಿದನೆ ದ್ವಾದಶ ನಾಮಗಳನು ||
ಸಂಧ್ಯಾವಂದನೆ ಮಾಡಿ ಪದ್ಮಾಸನದಿ ಕುಳಿತು|
ಇಂದಿರಾಪತಿಯ ಧ್ಯಾನದೊಳರಸಿ ತಾನು || ೭ ||
ಅಂದಾಗ ಆಯೆಡೆಗೆ ಅಗಸ್ತ್ಯಮುನಿ ಬಂದು|
ನಿಂದೆದ್ದು ವಂದನೆಯ ಮಾಡಲಿಲ್ಲೆಂದು ||
ಎಂದೆನುತ ಕೋಪಿಸುತ ಶಾಪಿಸಿದ |
ಕುಂಜರದ ರೂಪಾಗಿ ಜನಿಸು ಹೋಗೆಂದ || ೮ ||
ತಪ್ಪುಂಟು ಮಹ ಋಷಿಯೆ ಬಿನ್ನಪವ ಕೇಳು|
ಉಶ್ಯಾಪ ಎಂದಿಗಾಗುವುದೆನುತ ಪೇಳು ||
ವಿಷ್ಣು ಚಕ್ರವು ಬಂದು ನಿನ್ನ ಸೋಕುತಲಿರೆ |
ಉಶ್ಯಾಪ ಅಂದಿಗಾಗುವುದೆನುತ ಪೇಳೆ || ೯ ||
ಜ್ಞಾನವಡಗಿದವು ಅಜ್ಞಾನವಾವರಿಸೆ |
ಸೂರ್ಯ ಮುಳುಗಿದರೆ ಕತ್ತಲೆ ಮುಸುಕಿದಂತೆ ||
ಧ್ಯಾನಿಸುತ ಹಿಂದುಮುಂದಾಗಿ ಕುಳಿತಿರಲು |
ಆನೆ ಆದನು ನೃಪನು ಆ ಕ್ಷಣದಿ ತಾನು || ೧೦ ||
ಮೇರು ಮಂದರವು ಜರಿದಿಳಿದು ಬರುವಂತೆ |
ಮೇಲುಮದ ಕೀಳು ಮದ ಸುರಿಯೆ ಕುಂಭದಲಿ |
ಕಾಡಾನೆಯಲಿ ಹಲವು ಮಕ್ಕಳನೆ ಪಡೆದು |
ಕಾನನದೊಳಗೆ ಸಂಚರಿಸುತ್ತಿದ್ದ ತಾನು || ೧೧||
ಘಟ್ಟ ಬೆಟ್ಟಗಳ ಹತ್ತುತಲೆ ಇಳಿಯುತಲೆ |
ಹಿಟ್ಟು ಹಿಟ್ಟಾಗಿ ಗಿಡ ಮರವ ತುಳಿಯುತಲೆ ||
ದಟ್ಟಡವಿಯಲಿ ಸಂಚಾರವ ಮಾಡುತಲಿರೆ |
ಬತ್ತಿದವು ಕೆರೆತೊರೆಯು ಬೇಸಿಗೆಯು ಬರಲು || ೧೨ ||
ಕಂಡ ಕಂಡಲ್ಲಿ ಏರುತಲಿ ಇಳಿಯುತಲಿ |
ತುಂಡುತುಂಡಾಗಿ ಗಿಡಮರವ ಮುರಿಯುತಲಿ ||
ತಂಡ ತಂಡದಲಿದ್ದ ತನ್ನ ಸತಿ ಸುತರೆಲ್ಲ|
ಬೆಂಡಾಗಿ ಹಸಿವು ತೃಷೆಯಿಂದ ಬಳಲಿದರು || ೧೩ ||
ಬಾಳೆ ಕಿತ್ತಳೆ ನಿಂಬೆ ಚೂತ ಮಾದಲವು
ದಾಳಿಂಬ ದ್ರಾಕ್ಷಿ ಖರ್ಜೂರ ಪೇರಳೆಯು ||
ಮೇಲಾದ ಫಲಪುಷ್ಪದಿಂದ ಶೋಭಿಸುವ
ತಾವರೆಯ ಕೊಳವೊಂದ ಕಂಡ ಗಜರಾಜ || ೧೪ ||
ನವರತ್ನ ಮುತ್ತು ಮಾಣಿಕದ ಸೋಪಾನ |
ಕೊಳದ ಸುತ್ತಲು ಮುತ್ತಿ ಚಕ್ರವಾಕಗಳು ||
ನಲಿಯುತಿರೆ ಹಲವು ಹಕ್ಕಿಗಳು ಹಂಸಗಳು |
ಪರಿಮಳಿಸುವಾ ಕೊಳವ ಹೊಕ್ಕ ಗಜರಾಜ ||೧೫ ||
ಹೊಡೆಯುತಲಿ ಬಡೆಯುತಲಿ ಕುಡಿಯುತಲಿ ನೀರ |
ಮಡುವಿನಲಿ ಚೆಲ್ಲುತಲಿ ನಲಿದವೊಂದಾಗಿ ||
ಕಾಡಾನೆ ಕರಿಯಾನೆ ಮರಿಯಾನೆ ಸಹಿತ |
ಕೂಡಿಕೊಂಡಿರಲಿಂತು ಸಂಭ್ರಮದಿ ಜಲದಿ || ೧೬ ||
ಮುನಿಯ ಶಾಪದಳೊಂದು ಮಕರಿ ಮಡುವಿನಲಿ|
ಹಲವುಕಾಲದಿ ತಪಿಸಿ ಜೀವಿಸುತ್ತಿರಲು ||
ಮದಗಜವು ಪೊಕ್ಕು ಮಡುವನೆ ಕಲಕುತಿರಲು
ತಡೆಯದಾ ಮಕರಿ ಹಿಡಿಯಿತು ಕರಿಯ ಕಾಲ || ೧೭ ||
ಅತ್ತಿತ್ತ ನೋಡಿದನು ಸುತ್ತ ನೋಡಿದನು |
ಎತ್ತ ನೋಡಿದರೂ ಬಿಡದಾ ಮಕರಿ ಕಾಲು ||
ಎಳೆದೊಮ್ಮೆ ನೋಡಿದನು ಸೆಳದೊಮ್ಮೆ ನೋಡಿದನು |
ಸೆಳೆದು ಖೊಡವಿದರು ಬಿಡದಾ ಮಕರಿ ಕಾಲು || ೧೮ ||
ತನ್ನ ಸತಿ ಸುತರೆಲ್ಲ ಸೆಳದರೊಂದಾಗಿ |
ತಮ್ಮ ಕೈಲಾಗದೆಂದೆನುತ ತೆರಳಿದರು |
ನಿಮ್ಮ ಪುಣ್ಯದ ಫಲವು ಹೋಗಿ ನೀವೆಂದ |
ದುಮ್ಮಾನದಲಿ ದೂರದಲಿದ್ದರವರು || ೧೯ ||
ಕಚ್ಚುತಲಿ ಸೆಳೆಯುತಲಿ ಆ ಮಕರಿ ಕಾಲು |
ರಕ್ತಮಯವಾಗಿ ತುಂಬಿತು ಕೊಳದ ನೀರು |
ಅರ್ಕಟಾ! ಎನಗಿನ್ನು ಗತಿಯಾರು ಎಂದೆನುತ|
ದಿಕ್ಕುಗೆಟ್ಟಂತೆ ಮೊರೆಯಿಟ್ಟ ಗಜರಾಜ || ೨೦ ||
ಅಚ್ಯುತಾನಂತ ಶ್ರೀಹರಿಯೆನ್ನ ಕಾಯೋ |
ಸಚ್ಚಿದಾನಂದ ಸರ್ವೇಶ್ವರನೆ ಕಾಯೋ ||
ಭಕ್ತವತ್ಸಲನೆ ಭವಭಂಜನನೆ ಕಾಯೋ |
ಕಷ್ಟಪಡುತೇನೆ ಕರುಣಿಸಿ ಕರುಣಿ ಕಾಯೋ || ೨೧ ||
ಎಂಭತ್ತು ನಾಲ್ಕು ಲಕ್ಷ ಜೀವರಾಶಿಗಳಾ |
ಇಂಬಿಟ್ಟು ಸಲಹುವ ಜಗದೀಶ್ವರನೆ ಕಾಯೋ |
ಜಂಗಮ ಸ್ಥಾವರಗಳೊಳಗೆ ಪರಿಪೂರ್ಣನೆನಿಸಿ |
ನೀ ಎನ್ನ ಬಂಧನವ ಬಿಡಿಸಿ ಕಾಯೋ || ೨೨ ||
ಈರೇಳು ಲೋಕವನು ಹೃದಯದೊಳಗಿಟ್ಟೆ |
ಕಾದುಕೋ ಎಂದು ಮೊರೆಯಿಟ್ಟ ಗಜರಾಜ |
ಅಹಾರ ನಿದ್ರೆ ಇಲ್ಲದೆ ಸಾವಿರ ವರುಷ|
ಬಹಳ ನೊಂದೆನೊ ಸ್ವಾಮಿ ಕಾಯೋ ಬಾಯೆಂದ || ೨೩||
ವೇದವನು ಕದ್ದೊಯ್ದ ದಾನವನ ಛೇದಿಸಿ |
ಛೇದಿಸೀ ಅವನ ಭೇದಿಸಿದೆ ||
ಆದಿ ನಿಗಮವ ತಂದು ಕಮಲಜಂಗಿತ್ತೆ |
ವೇದಾಂತ ವೇದ್ಯ ಮತ್ಸ್ಯಾವತಾರ ಶರಣು || ೨೪ ||
ಸುರಾಸುರರು ಪಾಲ್ಗಡಲ ಮಥಿಸುತಿರಲು |
ಮುರವೈರಿ ಹಾಸಿಗೆಯ ಹುರಿ ಮಾಡಿಕೊಂಡು |
ಭರದಿ ಮಂದರಗಿರಿಯು ಇಳಿಯುತಿರೆ ಬಂದು |
ಗಿರಿಯನೆತ್ತಿದ ಕೂರ್ಮ ಹರಿ ನಿನಗೆ ಶರಣು || ೨೫ ||
ಸುರುಳಿ ಸುತ್ತಿದ ಭೂಮಿ ದಾಡೆಯಿಂದಲಿ ತಂದೆ |
ದುರುಳ ಹಿರಣ್ಯಾಕ್ಷನನು ಬೇಗದಲಿ ಕೊಂದೆ |
ಧರಣಿದೇವಿಯ ಸದಮಲದಲಿ ಗೆದ್ದೆ |
ವರಹಾವತಾರ ಶ್ರೀಹರಿ ನಿನಗೆ ಶರಣು || ೨೬ ||
ಬಾಲಕನು ಕರೆಯಲಿಕೆ ಕಂಬದಿಂದಲಿ ಬಂದೆ |
ಸೀಳಿ ರಕ್ಕಸನ ಕರುಳಿನ ಮಾಲೆ ಹಾಕಿದೆ ||
ಶೀಲ ಪ್ರಲ್ಹಾದನಿಗಭಯವನಿತ್ತ |
ಶ್ರೀಲಕ್ಷ್ಮಿ ಒಡನಿದ್ದ ನರಸಿಂಹ ಶರಣು || ೨೭ ||
ಬಲಿಯ ದಾನವ ಬೇಡಿ ಬ್ರಹ್ಮಚಾರಿಯಾಗಿ |
ನೆಲವನೆಲ್ಲವ ಮೂರು ಅಡಿಮಾಡಿ ಅಳೆದೆ ||
ಅಳೆದ ಪಾದದಲಿ ಭಾಗಿರಥಿಯ ತಂದೆ |
ಚೆಲುವ ವಾಮನ ತ್ರಿವಿಕ್ರಮನೆ ಶರಣು || ೨೮ ||
ದುಷ್ಟ ಕ್ಷತ್ರಿಯರ ಕುಲವ ಸಂಹರಿಸಿ |
ರಕ್ತದಲಿ ಸ್ನಾನ ತರ್ಪಣವ ನೀ ಕೊಟ್ಟೆ ||
ಮತ್ತೆ ವೇದಾಂತ ಶಾಸ್ತ್ರಗಳ ನೆರೆ ಓದಿದ |
ವಿಪ್ರ ಭಾರ್ಗವ ರಾಮ ಹರಿ ನಿನಗೆ ಶರಣು || ೨೯ ||
ಹರನ ಬಿಲ್ಲನೆ ಮುರಿದು ಧರಣಿಜೆಯ ತಂದೆ |
ದುರುಳ ರಾವಣನ ಹತ್ತು ಶಿರಗಳನು ತರಿದೆ |
ವರ ವಿಭೀಷಣನಿಗೆ ರಾಜ್ಯವನಿತ್ತ ದೇವ ||
ಶರಣು ರಕ್ಷಕ ಸೀತಾಪತಿ ರಾಮ ಶರಣು || ೩೦ ||
ಮಥುರೆಯಲಿ ಹುಟ್ಟಿ ಗೋಕುಲದಲಿ ಬೆಳೆದೆ |
ತರಳತನದಲಿ ಹಾಲು ಬೆಣ್ಣೆಗಳ ಕದ್ದೆ |
ತುರುವ ಕಾಯುತ ಕೊಂದೆ ಹಲವು ಪಾತಕರ |
ಬಲರಾಮಕೃಷ್ಣ ಗೋಪಾಲಕನೆ ಶರಣು || ೩೧ ||
ತ್ರಿಪುರ ಸತಿಯರ ವ್ರತವ ಅಪಹರಿಸಿದವನೆ |
ಪೃಥುವಿಯಲಿ ಅಶ್ವತ್ಥ ಗಿಡದಡಿ ಮೆರೆದವನೆ ||
ಬೆಸಗಣ್ಣ ಹರಗೆ ಅಂಬಾಗಿ ನಿಂತವನೆ ||
ಪಶುಪತಿವಂದ್ಯ ಬೌದ್ಧಾವತಾರ ಶರಣು || ೩೨ ||
ವರ್ಣಾಶ್ರಮಗಳೆಲ್ಲ ಒಂದಾಗಿ ಇರಲು |
ಬಿನ್ನಾಣದಿಂದ ತುರುಗವನೇರಿಕೊಂಡು ||
ಬನ್ನ ಬಡಿಸುತ ಕೊಂದೆ ಹಲವು ಪಾತಕರ |
ಬ್ರಹ್ಮಸ್ವರೂಪ ಕಲ್ಕ್ಯಾವತಾರ ಶರಣು || ೩೩ ||
ಅರಿಯೆನೆಂದೆನದೆ ಅಚ್ಯುತ ರಕ್ಷಿಸೆನ್ನ |
ಮರೆತೆನೆಂದೆನದೆ ಮಾಧವ ರಕ್ಷಿಸೆನ್ನ ||
ಕೇಳನೆಂದೆನದೆ ಕೇಶವ ರಕ್ಷಿಸೆನ್ನ |
ಕಾಣನೆಂದೆನದೆ ಕರುಣಿಸಿ ರಕ್ಷಿಸೆನ್ನ || ೩೪ ||
ಕಾಯೊ ಕಂಜರ ಎನ್ನ ಪ್ರಾಣ ಹೋಗುತಿದೆ |
ಯಾವಾಗ ಹರಿಬಂದು ಕಾಯ್ವನೋ ಎನುತ |
ಕೂಗಿದನು ಚೀರಿ ಮೊರೆಯಿಟ್ಟ ಗಜರಾಜ |
ದಾನವಾಂತಕನು ಕಿವಿಗೊಟ್ಟು ಕೇಳಿದನು || ೩೫ ||
ಕ್ಷೀರಾಬ್ಧಿಯಲಿ ವೈಕುಂಠದಲಿ ನೆಲಸಿದ್ದ|
ಶೇಷನಾ ಹಾಸಿಗೆಯ ಮೇಲೆ ಕುಳ್ಳಿರ್ದ ||
ಶ್ರೀಲಕ್ಷ್ಮೀ ಸಮ್ಮೇಳನದಿಂದ ಒಪ್ಪಿರಲು |
ಆಲಯಿಸಿ ಕೇಳಿದನೆ ಅಜನ ಪೆತ್ತವನು || ೩೬ ||
ಶಂಖ ಚಕ್ರಗಳಿಲ್ಲವೆಂದು ಶಂಕಿಸದೇ |
ಬಿಂಕದಿಂ ಗರುಡನ್ನ ಹೆಗಲೇರಿ ಕೊಳ್ಳದೆ ||
ಪಂಕಜಾಕ್ಷಿಯ ಕೂಡ ತಾನು ಉಸುರದೆ ||
ಪಂಕಜನಾಭ ಬಂದನೆ ಕೊಳದ ಕಡೆಗೆ || ೩೭ ||
ಸಜ್ಜೆ ಉಪ್ಪರಿಗೆಯಿಂದಿಳಿದು ಬರುವಾಗ |
ವಜ್ರಕುಂಡಲ ಪದಕ ಹಾರಗಳು ಹೊಳೆಯೆ |
ಹೊದ್ದ ಪೀತಾಂಬರವು ನೆಲಕೆ ಅಲೆಯುತಲಿರೆ |
ಎದ್ದು ಬಂದನೆ ದಯಾಸಮುದ್ರ ಬಂದಂತೆ || ೩೮ ||
ಸಿಂಧುಸುತೆ ತನ್ನ ಪತಿಯೆಲ್ಲಿ ಪೋದನೋ ಎನುತ |
ಮಂದಗಮನೆಯು ಬಂದು ಪುರವೆಲ್ಲ ತೆರಳೆ ||
ಹೊಂದಿಸುತ ಗರುಡನ್ನ ಹೆಗಲೇರಿಕೊಳ್ಳಲು|
ಅಂದಾಗ ಶಂಖಚಕ್ರವು ಕೂಡಿ ಬರಲು || ೩೯ ||
ಹರಿಯು ಗರುಡವನೇರಿ ಕರಿಯತ್ತ ಬರಲು |
ಹರ ಪಾರ್ವತಿಯರು ನಂದಿಯನೇರಿ ಕೊಳುತ ||
ಶಿರದ ಮೇಲಿನ ಗಂಗೆ ತುಳುಕಾಡುತಿರಲು |
ಹರ ಬಂದ ಕೈಲಾಸ ಗಿರಿಯಿಂದಲಾಗ || ೪೦ ||
ತೊಡೆಯ ಮೇಲಿನ ಗೌರಿದೇವಿಯಳ ಸಹಿತ |
ಮುಡಿಯ ಮೇಲಿನ ಗಂಗೆ ತುಳುಕಾಡು ತಿರಲು |
ಹರಪಾರ್ವತಿದೇವಿ ವೃಷಭವನ್ನೇರಿ |
ಹರ ಬಂದ ಕೈಲಾಸಪುರದಿಂದ ಇಳಿದು || ೪೧ ||
ದೇವ ಋಷಿ ಬ್ರಹ್ಮ ಋಷಿ ರಾಜ ಋಷಿ ಸಹಿತ |
ದೇವ ಪುತ್ರಾದಿ ಸನಕಾದಿಗಳು ಕೂಡಿ ||
ಸುಮ್ಮನೇ ನಾರದರಂದು ನಡೆತರಲು |
ಬ್ರಹ್ಮ ಸ್ವರೂಪರೆಲ್ಲ ನೆರೆದರಂದು || ೪೨ ||
ಬಂದು ಚಕ್ರವನು ಕರಕಮಲದಲಿ ತೆಗೆದು |
ಬಂಧಿಸಿಟ್ಟನು ಮಕರಿ ಹಲ್ಲು ಮುರಿವಂತೆ |
ಅಂದಿಗವನ ಶಾಪ ಉಶ್ಯಾಪವಾಗಿ |
ಗಂಧರ್ವ ರೂಪಿನಲಿ ನಿಂತಿತಾ ಮಕರಿ || ೪೩ ||
ಹರಿಯ ಸುದರ್ಶನವು ಮದಗಜಕೆ ಸೋಕುತಲೆ |
ಒದಗಿದವು ನಾಲ್ಕು ಕೈಗಳು ಶಂಖ ಚಕ್ರ |
ಉಟ್ಟ ಪಿತಾಂಬರವು ಕಿರೀಟ ಕುಂಡಲವು |
ಎಳೆತುಳಸಿಮಾಲೆಗಳು ಕೊರಳೊಳೊಪ್ಪಿದವು || ೪೪ ||
ಜಯಜಯ ಜಗನ್ನಾಥ ಜಯ ವಿಶ್ವರೂಪ|
ಜಯ ಜಯ ಜನಾರ್ಧನ ಜಯ ವಿಶ್ವಮೂರ್ತಿ |
ಜಯತು ಸರ್ವೋತ್ತಮನೆ ಕ್ಷಿರಾಬ್ಧಿಶಯನ |
ಜಯವೆಂದು ಪದಗಳಿಗೆ ಬಂದು ಎರಗಿದನು || ೪೫ ||
ಇಂದಿವನ ಭಾಗ್ಯವನು ನೋಡುವರು ಕೆಲರು |
ಇಂದಿರಾ ಪತಿಯ ಕೊಂಡಾಡುವರು ಕೆಲರು |
ಮಂದಾರ ಪೂಮಳೆಯ ಕರೆಯುತ್ತ ಸುರರು|
ದುಂದುಭಿ ವಾದ್ಯಗಳ ವೈಭವಗಳಿರಲು || ೪೬ ||
ಸಿರಿಸಹಿತ ಹರಿಯು ಗರುಡವನೇರಿಕೊಂಡು
ಕರಿರಾಜನೊಡನೆ ವೈಕುಂಠಕ್ಕೆ ಬರಲು ||
ಹರಪಾರ್ವತಿಯರು ಕೈಲಾಸಕೆ ತೆರಳೆ |
ತರತರದ ವಾಹನದಿ ಸುರರು ತೆರಳಿದರು || ೪೭ ||
ಹೊತ್ತಾರೆ ಎದ್ದು ಈ ಕಥೆ ಹೇಳಿ ಕೇಳ್ದವರಿಗೆ |
ದುಃಸ್ವಪ್ನ ದುರ್ಬುದ್ಧಿ ದುರ್ವ್ಯಸನ ಕಳೆಯುವುದು ||
ಸರ್ಪಾರಿ ವಾಹನನ ಧ್ಯಾನದೊಳಿರಲು |
ಸತ್ಸಂಗ ಸಾಯುಜ್ಯ ಪದವಿ ದೊರಕುವುದು || ೪೮ ||
ಹರಿಯ ನೆನೆ ಹರಿಯ ನೆನೆ ಹರಿಯ ನೆನೆ ಮನವೆ
ಮರೆಯದಲೆ ಮಾಧವನ ನೆನೆ ಕಂಡ್ಯ ಮನವೆ |
ಹರಿಯ ನೆನೆದವರಿಗೆ ಪರಮ ಪದವಿ ಉಂಟು |
ಕರಿರಾಜವರದನ್ನ ಶರಣೆಂದು ಭಜಿಸು || ೪೯ ||
ಜಯತು ಧ್ರುವರಾಯನಿಗೆ ವರವಿತ್ತ ದೇವ |
ಜಯತು ಪ್ರಲ್ಹಾದಗೆ ಅಭಯವಿತ್ತ ದೇವ |
ಜಯತು ದ್ರೌಪದಿಯ ಅಭಿಮಾನ ಕಾಯ್ದ ದೇವಾ|
ಜಯತು ಜಯ ಹಯವದನ ಶ್ರೀವಾಸುದೇವ || ೫೦ ||
***
No comments:
Post a Comment