ಗೌರಿ ಗಜಮುಖನ ಮಾತೆ ಗುಣಗಣಭರಿತೆ ankita jayesha vittala

ಶ್ರೀ ಜಯೇಶವಿಠಲರ ಕೃತಿ

ರಾಗ ನವರೋಜ್      ಆದಿತಾಳ 

ಗೌರಿ ಗಜಮುಖನ ಮಾತೆ ಗುಣಗಣಭರಿತೆ ।

ಶೌರಿಯ ಸಖನಂಗ ಸಂಗಿ ಸಂಪೂರ್ತೇ || ಪ ||

ಸೌರಭ ಶುಭತನು ವಾರಿಜನೇತ್ರಳೆ

ವೀರಸತಿಯೆ ದಯವಾರಿಧಿ ರಕ್ಷಿಸು || ಅ.ಪ. ||

ತುಂಗಮಂಗಳೇ ದೇವಿ | ಕಲಿಗೆ ಭೈರವೀ ।

ರಂಗನ ಸಖನಂಗಸಂಗ ನೀಡುವಿ ।

ಹಿಂಗದೆ ಪೊರೆಯೆ ತಾಯೇ | ಭಕ್ತ ಸಂಜೀವೇ ।

ತಿಂಗಳಮುಖಿ ವರಗರೆವೆ | ನಮ್ಮ ಶಾಂಭವೇ ॥

ಭಂಗವ ಪಟ್ಟೆನು ನುಂಗುವ ಭವದೊಳು

ಮಂಗಳೆ ಕರುಣಾಪಾಂಗದಿ ನೋಡೆನ್ನ

ಹಿಂಗಿಸು ಭವ ಭಯ ಗಂಗೆಯಧರನಂಘ್ರಿ 

ಭೃಂಗಳಭೋದಯ ಕಂಗಳೆ ಕರುಣಿಸು || 1 ||

ಇಂದ್ರಾದಿ ಸುರಗುರುವೆ | ದೇವತರುವೇ

ನೊಂದು ನಾನಾ ಪರಿ ನಿನ್ನ ಬೇಡುವೆ

ಕುಂದೆಣಿಸದಲೆ ಶಿವ ಶಂಕರಿ ಕಾವೆ

ಸಂದೇಹ ಕಳಿ ವಿಭುವೆ | ವಿರಾಜತನುವೆ ॥

ವಂದಿಪೆ ತತ್ಪದ ದ್ವಂದ್ವಕೆ ಪರಿಪರಿ 

ನೊಂದವನಾ ಮ್ಯಾಲ್ಹೊಂದಿಸು ಕರುಣವ

ಮಂದಸ್ಮಿತೆ ಮುಕುಂದನ 

ವಂದಿಸು ಅನಿಮಿತ್ತಬಂಧುವೆ ರಕ್ಷಿಸು || 2 ||

ಕಸ್ತೂರಿ ಕುಂಕುಮ ಫಾಲೆ | ರನ್ನಾದ ಓಲೆ

ವಸ್ತ್ರಗಳಿಟ್ಟ ಹಿಮವಂತನ ಬಾಲೆ

ಶಿಸ್ತಿನ ಶುಭ್ರಾಂಬರಧಾರೆ ವನಮಾಲೆ

ಮಸ್ತಕದ ಕಿರೀಟ ವದನತಾಂಬೂಲೆ

ಮಸ್ತಕದಲಿ ಸಿರಿಹಸ್ತಗಳಿಟ್ಟೆನ್ನ

ದುಸ್ತರಾದಿಗಳಸ್ತವ ಮಾಳ್ಪುದು

ವಿಸ್ತಾರಮಹಿಮ ಶ್ರೀಜಯೇಶವಿಠಲ

ವಸ್ತುವ ನೀಡಮ್ಮ ಹಸ್ತಿಯಗಮನೆ || 3 ||

********