ರಾಗ: ಕಾಪಿ
ನೋಡ್ ನೋಡೇ / (ನೋಡ್ ನೋಡ ) ಶ್ರೀಹರಿ ತಾನೆಂಥ ಚೆಲುವ ನೋಡೇ
ನೋಡ್ ನೋಡೇ ರುಕ್ಮಿಣಿ ಅರಸೆಂಥಾ ಚೆಲುವ ನೋಡೇ ।।
ಕಾಲಿನಲ್ಲಿ ಗೆಜ್ಜೆ ನೋಡೇ ಮೇಲೆ ಪೈಝಣಿ ಸರಪಳಿ ನೋಡೇ ।
ಉಂಗುಷ್ಟದಿಂದ ಗಂಗೆಯ ಪಡೆದ ಮಂಗಳಾತ್ಮಕ ರಂಗನ ನೋಡ್ ನೋಡೇ ।।
ವಜ್ರದ ಕಿರೀಟ ನೋಡೇ ಕರ್ಣಕುಂಡಲಗಳ ನೋಡೇ ।
ಚಿನ್ನದ ಕೊಳಲನೂದುವಂಥ ಪುಟ್ಟ ಬಾಲಕೃಷ್ಣನ ನೋಡ್ ನೋಡೇ ।।
ವಕ್ಷಸ್ಥಳದಲಿ ಲಕ್ಷ್ಮಿಯ ನೋಡೇ ವೈಜಯಂತಿ ಮಾಲೆಯ ನೋಡೇ ।
ನಾಭಿಯಿಂದ ಬ್ರಹ್ಮನ ಪಡೆದ ನೀಲವರ್ಣ ಕೃಷ್ಣನ ನೋಡ್ ನೋಡೇ ।।
ಕಂದನ ಮೊರೆಯ ಕೇಳಿ ಕಂಭದಿಂದ ಒಡೆದು ಬಂದ ।
ಹಿರಣ್ಯ ಕಶಿಪಿನ ಒಡಲ ಸೀಳಿ ಕರುಳ ಮಾಲೆ ಧರಿಸಿದ ನೋಡ್ ನೋಡೇ ।।
ಕರಿಯ ರಾಜನ ಮೊರೆಯ ಕೇಳಿ ಚಕ್ರದಿಂದ ನಕ್ರನ ಸೀಳಿ ।
ಪುರಂದರ ವಿಠ್ಠಲನಾಗಿ ತಾನು ಗಿರಿಯ ಮೇಲೆ ನಿಂತ ನೋಡ್ ನೋಡೇ ।।
***
No comments:
Post a Comment