ದಿಕ್ಕು ತೋಚದಲ್ಲೊ ಹಯಮುಖ ಎನ್ನ ವಡಲ ankita badarayana vittala

 ರಾಗ - : ತಾಳ -

ದಿಕ್ಕು ತೋಚದಲ್ಲೊ ಹಯಮುಖ ಎನ್ನ ವಡಲ l 

ದುಃಖ ಕೇಳಿ ಸಲಹೊ ಶಿವಸಖಾ ll ಪ ll

ಮರ್ಕಟಗಳ ಚಪಲದಂತೆ ಕಕ್ಕವಿಕ್ಕಿ ಮಾಡಿ ಕುಮಾ l

ರ್ಗಕ್ಕೆ ಎಳದು ತತ್ವ ದೇವರ್ಕಳೆಲ್ಲ ನಗುತಾರೆ ll ಅ ಪ ll

ನಿನ್ನ ಪಾದದಲಿ ಮನವನೂ ನಿಲ್ಲಿಸದಲೆ l 

ಹೊನ್ನು ಹೆಣ್ಣಿನಲಿ ರತಿಯನೂ l

ಚನ್ನವಾಗಿ ಕೊಟ್ಟು ಎನಗೆ ಹೆಣ್ಣು ನಾಯಿ ಹಿಂದೆ ಅಲಿವ l

ಕುನ್ನಿಯಂತೆ ಮಾಡಿ ಇಕ್ಕೊ ಬನ್ನ ಬಡಿಸುತೈದಾರೆ ll 1 ll

ಬ್ಯಾಸರಿಕೆ ಎನ್ನೆ ಕೊಡುವರೊ ನಿನ್ನ ಧ್ಯಾನ l

ಲೇಶವಾದರೂನು ನೀಡರೊ l

ದೋಷಿ ಎನಿಸಿ ಎನ್ನ ತಾವು ದೋಷದೂರರಾಗಿ ಸಂ l

ತೋಷ ಬಡುತಲಿಹರು ನಾ ದ್ವೇಷಿ ಏನೊ ಇವರಿಗೆಲ್ಲಾ ll 2 ll

ನಾಯಾರಿಗಿನ್ನು ಸೇರಲೈ ಸಕಲ ತತ್ವ l 

ನಾಯಕರಿಗೆ ನಾಥ ನೀನೆಲೈ l 

ವಾಯುವಿನುತ ಶ್ರೀಶ ಬಾದರಾಯಣವಿಟ್ಠಲ ನೀನೆ l

ಕಾಯಬೇಕೊ ಕರುಣಿ ನಿನಗೆ ಬಾಯಿಬಿಟ್ಟು ಬೇಡಿಕೊಂಬೆ ll 3 ll

***