ಕೊಳಲನೂದುವ ನಮ್ಮ ಚಲುವ ಕೃಷ್ಣಯ್ಯ
ನಳಿನಾಕ್ಷಿಯರ ಮಧ್ಯೆ ಪೊಳೆವ ರಂಗಯ್ಯ ಪ.
ಕರದ್ವಯದಲಿ ಶಂಖ ಚಕ್ರಪಿಡಿದಿಹ
ಕಿರುನಗೆ ನಗುತ ಸುಲಿಪಲ್ಲಿನ ಚಲುವ
ಸ್ವರಗಳ ಪಿಡಿಯುತ ವೇಣು ನುಡಿಸುವ
ಸರಸಿಜನಾಭ ಹೃನ್ಮಂದಿರದಿ ಮೆರೆವ 1
ಜಗವ ಮೋಹಿಸುವಂಥ ನಗೆಯ ಮೊಗ ಚೆಲುವ
ಹೆಗಲು ಎಡದಲ್ಲಿ ಗಲ್ಲ ತಗುಲಿಸಿ ಇರುವ
ಖಗವಾಹನ ಹಸ್ತ ಸತಿ ಹೆಗಲಲಿ ಇಡುವ
ನಗಧರ ನರ್ತನವಾಡಿ ಮುದವೀವ 2
ಕಾಲಕಡಗ ಗೆಜ್ಜೆ ಪಾಡಗರುಳಿಯು
ಮೇಲೆ ಪೀತಾಂಬರ ಜರಿಯ ವೈಭವವು
ಸಾಲ ಮುತ್ತಿನಹಾರ ಪದಕದ್ವಜ್ರಗಳು
ಓಲಾಡುವ ನೀಲಾಂಬರ ಹೊದ್ದಿಹ ಒಲಪು 3
ಕಂಠ ಕೌಸ್ತುಭಮಣಿ ಅಧರದ ಕೆಂಪು
ಒಂಟಿ ಚೌಕುಳಿ ಕರ್ಣ ಕದಪು ಕನ್ನಡಿಯು
ಬಂಟರಾದವರನ್ನು ಪೊರೆಯುವ ದೃಷ್ಟಿ ವೈ -
ಕುಂಠನ ನಾಸಿಕ ಫಣೆಯ ತಿಲುಕವು 4
ಶ್ರೀಪತಿ ಮುಂಗುರುಳು ಶಿರದಲ್ಲಿ ಮಕುಟ
ಪಾಪವ ದಹಿಸುವ ಪಾವನ ವೇಣು
ಆಪಾದ ಮೌಳಿಯ ರೂಪದ ಚಲುವ
ಗೋಪಾಲಕೃಷ್ಣವಿಠ್ಠಲ ಎನ್ನ ಕಾವ 5
****
No comments:
Post a Comment