ರಾಗ : ಶಂಕರಾಭರಣ ತಾಳ : ಆದಿ
ಯಾವ ಗುರುಗಳಿಗುಂಟು -
ಈ ವೈಭವವು ।
ಪವನನೊಡೆಯನ ಭಕ್ತ ರಾ-
ಘವೇಂದ್ರರಿಗಲ್ಲದಲೆ ।। ಪಲ್ಲವಿ ।।
ವರ ತುಂಗಾ ತೀರದಲಿ ।
ಮೆರೆವ ಮಂತ್ರಾಲಯದಿ ।
ತರಣಿಯಂದದಿ ಮೆರೆದು । ಭ ।
ಕ್ತರನು ಪೋಷಿಸುವ ।
ಶರಣ ರಕ್ಷಕನೆಂಬ ।
ಬಿರುದಿಂದ ತಾ ಮೆರೆವ ।
ವರ ಮಧ್ವ ಕುಲಚಂದ್ರ ।
ಗುರುರಾಜಗಲ್ಲದೆ ।। ಚರಣ ।।
ಸಂತರೆಲ್ಲರೂ ಬಂದು ।
ಶಾಂತಿಯಿಂದಲಿ ನಿಂದು ।
ಕಂತುಪಿತನ ಭಕ್ತ ।
ಚಿಂತೆಯನ್ನು ಹರಿಸೆಂದು ।
ಸಂತತವು ಬೇಡುತಿಹ ।
ಶಾಂತರಾಗಿಹ ಜನರ ।
ಸಂತೋಷದಲಿ ಕಾಯ್ವ -
ಗುರುರಾಜಗಲ್ಲದೆ ।। ಚರಣ ।।
ಕಾವಿ ವಸ್ತ್ರವನು ಧರಿಸಿ ।
ಕವಿದ ಭ್ರಮೆಯನು ಬಿಡಿಸಿ ।
ಭುವಿಜ ರಮಣನ ಭಜಿಪ ।
ಕವಿ ಕುಲೋತ್ತಮ ನಮ್ಮ ।
ಸೇವಕರ ಸುರಧೇನು ।
ಪಾವನಾತ್ಮನು ಆದ ।
ಕೃಷ್ಣ ವಿಠ್ಠಲನ ಭಕ್ತ -
ಗುರುರಾಜಗಲ್ಲದೆ ।। ಚರಣ ।।
****
No comments:
Post a Comment