ಹ್ಯಾಗಾಗುವದು ನಿನ್ನ ದಯವೆನ್ನೊಳೂ ankita badarayana vittala

ಹ್ಯಾಗಾಗುವದು ನಿನ್ನ ದಯವೆನ್ನೊಳೂ l

ಕಾಗಿ ಗೂಗಿಗಳಂತೆ ಕಾಲ ಕಳಿವೆನು ಹರಿಯೆ ll ಪ ll

ನಿದ್ರೆಗೊಳಗಾಗದಲೆ ಅರ್ಧರಾತ್ರಿಯೊಳೆದ್ದು l

ಶುದ್ಧಮತಿಯಲಿ ನಿಮ್ಮ ಮುದ್ದುನಾಮಾ l

ಎದ್ದು ನೆನೆಯುವ ಜನರ ಗದ್ದಲವ ಸಹಿಸದಲೆ l

ಎದ್ದು ದೂರೋಡುವೆನು ನಿದ್ರೆ ಬರದಂತೆಂದು ll 1 ll

ನರಸಿಂಹ ಹರಿಕೃಷ್ಣ ದುರಿತ ಸಂಹಾರ ಸಿರಿ l

ಮರುತನೊಡಿಯನೆ ನಿಮ್ಮ ಸ್ಮರಣೆ ಮಾತ್ರಾ l

ದುರಿತ ಕಶ್ಮಲವನ್ನು ವರಹ ಕೇಸರದಂತೆ l

ಪರಿಹರಿಸುವದೆಂಬದರಿಯದತಿ ಮೂಢನಿಗೆ ll 2 ll

ಹಗಲಿರುಳು ಬಿಡದೆನಗೆ ಮೊಗದ ನಾರಿಯರ ಮೈ l

ಬಗೆಯ ಗುಣಿಸುತ ಮನದಿ ಮರುಗುತಿಹ್ಯನೊ l

ನಿಗಮೇಶ ನಿನ್ನ ವಂದರಘಳಿಗೆ ನೆನಿಯನೊ l

ಜಗದೀಶ ಹರಿದಾಸ ವೇಷ ಧರಿಸದೆ ವ್ಯರ್ಥ ll 3 ll

ಗುಡ್ಡದಂತಿಹ್ಯ ಪಾಪ ಖಡ್ಡಿಯಂದದಿ ಮಾಳ್ಪ l

ದೊಡ್ಡವರ ಪಾದಾಂಬೋಜಗಳಿಗೆ l

ಅಡ್ಡ ಬೀಳದೆ ಪರಮ ದಡ್ಡನಾದೆನೊ ನಾನು l

ಗಡ್ಡ ಪಿಡಿದ್ಹೇಳಿಕೊಂಬೆ ಮುಂದೇನು ಗತಿಯೊ ll 4 ll

ಆದರದಿ ನಿನ್ನ ಪಾದಾರಾಧನಾದಿ ವರ l

ಸಾಧನವ ಮಾಡಿದವನಲ್ಲ ನಾನು l

ಶ್ರೀದ ಶ್ರೀ ಬಾದರಾಯಣವಿಟ್ಠಲ ನೀನಾ l

ಗಿ ದಯಮಾಡಬೇಕೈಯ್ಯ ಕರುಣಾಬ್ಧೆ ll 5 ll

***