ಕೃಷ್ಣನ ನೋಡಿದೆ ಸರ್ವೋತ್ಕೃಷ್ಟನ ಪಾಡಿದೆ ankita venugopala vittala KRISHNANA NODIDE SARVOTKRUSHTANA PAADIDE

ಶ್ರೀ ಪಂಗನಾಮ ತಿಮ್ಮಣ್ಣದಾಸರ ಕೃತಿ ( ವೇಣುಗೋಪಾಲವಿಠಲ ಅಂಕಿತ)

ಕೃಷ್ಣನ ನೋಡಿದೆ ಸರ್ವೋತ್ಕೃಷ್ಟನ ಪಾಡಿದೆ ॥ ಪ ॥

ಕೃಷ್ಣನ ನೋಡಿ ಸಾಷ್ಟಾಂಗವ ಮಾಡಿದೆ
ಕಷ್ಟವ ಪರಿಹರಿಸಿ ಇಷ್ಟವನೀವನ ॥ ಅ ಪ ॥

ಶಿಷ್ಟನ ನೋಡಿದೆ ವರನಿರ್ದುಷ್ಟನ ಪಾಡಿದೆ
ಹೃಷ್ಟಪುಷ್ಟಸಂತುಷ್ಟನ ಶ್ರೇಷ್ಠನ
ಶಿಷ್ಟರ ಕಷ್ಟನಿವಿಷ್ಟನ ದೇವನ ॥ 1 ॥

ರಂಗನ ನೋಡಿದೆ ದೇವೋತ್ತುಂಗನ ಪಾಡಿದೆ
ಅಂಗಸಿಂಗ ಕಾಳಿಂಗಮರ್ದನನ
ಮಂಗಳಾಂಗ ಭವಭಂಗನ ನೋಡಿದೆ ॥ 2 ॥

ದೇವನ ನೋಡಿದೆ ಮುಕುತಿಯೀವನ ಪಾಡಿದೆ
ಗೋವಕಾವ ಭೂದೇವವಂದಿತ ಬಲ -
ದೇವಾನುಜ ಹಯಗ್ರೀವನ ನೋಡಿದೆ ॥ 3 ॥

ಧೀರನ ನೋಡಿದೆ ಜಗದೋದ್ಧಾರನ ಪಾಡಿದೆ
ವೀರ ಶೂರ ಪರಾತ್ಪರ ತಾನ -
ಕ್ರೂರವರದ ಸಿರಿಧಾರನ ನೋಡಿದೆ ॥ 4 ॥

ಶ್ಯಾಮನ ನೋಡಿದೆ ಬಲುನಿಸ್ಸೀಮನ ಪಾಡಿದೆ
ವಾಮನ ರಾಮನ ಕಾಮನ ಅಯ್ಯನ
ಸಾಮನ ಸೀಮನ ಸೋಮನ ನೋಡಿದೆ ॥ 5 ॥

ಬಾಲನ ನೋಡಿದೆ ಲಕುಮಿವಿಲೋಲನ ಪಾಡಿದೆ
ಶೀಲ ಶೂಲಧರಪಾಲ ಲೀಲ ಶಿಶು -
ಪಾಲಕಾಲ ವನಮಾಲನ ನೋಡಿದೆ ॥ 6 ॥

ಜಾಣನ ನೋಡಿದೆ ಬಲುವಿನೋದನ ಪಾಡಿದೆ
ಗುಣಗಣ ಅಗಣಿತಪ್ರಾಣರ ಪ್ರಾಣನ
 ವೇಣುಗೋಪಾಲವಿಠ್ಠಲ ಕಲ್ಯಾಣನ ॥ 7 ॥
***

 ರಾಗ ಯಮನ್ ಕಲ್ಯಾಣಿ           ರೂಪಕತಾಳ