ವನಜನಯನನ ಮನವ ಮಧುಪ ನಂಬುವರೆ ankita rangavittala

ರಾಗ : ಆಹರಿ ತಾಳ : ಝಂಪೆ

ವನಜನಯನನ ಮನವ ಮಧುಪ ನಂಬುವರೆ

ಮನದೆಗೆದ ಮದನಪಿತ ವಿಠಲರೇಯಾ                   ||ಪ||

ಅರಿಯದ ಬಾಲೇರಿಗೆ ತನ್ನ ಪರಿಯನರುಹಿಸಿ ಮುನ್ನ

ನೆರೆದು ರತಿಪತಿಯ ಸುಖ ನೆರೆದೋರಿದ

ತೊರೆದು ಬದುಕುವೆವೆಂತೋ ರತಿಪತಿಯ ಪಿತನಗಲಿ

ವಿರಹದುರಿ ತಾನಳವಡರಿ ಸುಡುತಿಹುದು               ||೧||

ನಡೆ ನಗೆಯ ತುದಿನೋಟ ಬಲೆಯನೆಮ್ಮೊಳು ಬೀಸಿ

ಬಿಡದೆಯೆಮ್ಮನು ತನ್ನ ವಶಮಾಡಿದ

ಪಡಿಯಿಲ್ಲದನುಭವದ ಸುಖದ ಸವಿಯನೆ ತೋರಿ

ಮಡದಿ ತಡೆದಳೊ ಮಧುರೆಯಲಿ ನಲ್ಲನ  ||೨||

ಎಂದೆಂದು ನಿಮ್ಮ ವಶದಲ್ಲಿಹೆನೆಂದಭಯವಿತ್ತು

ಇಂದುಮುಖಿ ನಾರಿಯರ ನೆರೆ ನಂಬಿಸಿ

ನಂದನಂದನ ನಮ್ಮ ಕಾನನದೊಳೀಡ್ಯಾಡಿ

ಇಂದು ಮಧುರೆಯ ನಾರಿಯರ ನೆಚ್ಚಿದ   ||೩||

ಇವನ ವಚನದ ಕಪಟ ತಿಳಿಯಲರಿಯದೆ ನಾವು

ನವ ಹರಿಣಿಯಂತೆ ಮರುಳಾಗಿ ಕೇಳಿ

ವಿವರವರಿಯದೆ ನಾವು ಕಡು ನೊಂದೆವೆಲೊ ಮಧುಪ

ಇವನ ಗುಣವರಿಯದೆ ಕಡು ಕರುಣಿ ಎಂಬುವರು ಬರಿದೆ ||೪||

ಪತಿಸುತರ ಭವಬಂಧನಗಳೆಲ್ಲ ಈಡ್ಯಾಡಿ

ಗತಿ ನಮಗೆ ಅವನೆಂದು ಮನಸೋತೆವೋ

ಕೃತಕವರಿಯದೆ ನಮ್ಮ ವನದೊಳು ನಿಲ್ಲಿಸಿ ಪೋದ

ಪತಿಯೊಡನೆ ಸಂಧಾನವೆಂತೊ ಎಲೊ ಮಧುಪ ||೫||

ಮರುಳುಗಳು ನಾವು ಶ್ರೀಪತಿಯ ಕೂಟವ ಬಯಸಿ

ಇರುಳು ಹಗಲು ಜರಿ ಜರಿದಳಲುವೆವು

ಸಿರಿಯವನ ಉಂಗುಟದ ಉಗುರು ಗುಣ ಕಾಣಳೆಲೊ

ಹರಿ ನಮ್ಮ ನೆರೆದುದಚರಿಯಲ್ಲವೇ ಜಗದಿ ||೬||

ತುಂಗಗುಣ ನಿಲಯ ಅಂಗಜನ ಪಿತನೆಂದು

ರಂಗನಿಗೆ ಮನಸೋತು ಮರುಳಾದೆವೋ

ಹಿಂಗು ಬದುಕುವುದೆಂತೋ ಘೃಂಗ ಮಧುರೆಗೆ ಪೋಗಿ

ರಂಗವಿಠಲನ ತಂದೆಮ್ಮನುಳುಹುವುದೋ ||೭||

***

Vanajanayanana manava madhupa nambuvare

Manadegeda madanapita vithalareya ||pa||

Ariyada balerige tanna pariyanaruhisi munna

Neredu ratipatiya suka neredorida

Toredu badukuvevento ratipatiya pitanagali

Virahaduri tanalavadari sudutihudu ||1||

Nade nageya tudinota baleyanemmolu bisi

Bidadeyemmanu tanna vasamadida

Padiyilladanubavada sukada saviyane tori

Madadi tadedalo madhureyali nallana ||2||

Endendu nimma vasadallihenendabayavittu

Indumuki nariyara nere nambisi

Nandanandana namma kananadolidyadi

Indu madhureya nariyara neccida ||3||

Ivana vacanada kapata tiliyalariyade navu

Nava hariniyante marulagi keli

Vivaravariyade navu kadu nondevelo madhupa

Ivana gunavariyade kadu karuni embuvaru baride ||4||

Patisutara bavabandhanagalella idyadi

Gati namage avanendu manasotevo

Krutakavariyade namma vanadolu nillisi poda

Patiyodane sandhanavento elo madhupa ||5||

Marulugalu navu sripatiya kutava bayasi

Irulu hagalu jari jaridalaluvevu

Siriyavana umgutada uguru guna kanalelo

Hari namma neredudachariyallave jagadi ||6||

Tungaguna nilaya angajana pitanendu

Ranganige manasotu maruladevo

Hingu badukuvudento grunga madhurege pogi

Rangavithalana tandemmanuluhuvudo ||7||

*****