ಹುಂಕಾರದಿಂದಲಿ ನಿತ್ಯ ಭೂತಗಳಟ್ಟಿ ಕಿಂಕರರನು ankita hayavadana HOONKAARADINDALI NITYA BHOOTAGALATTI KINKARNU

ಹುಂಕಾರದಿಂದಲಿ ನಿತ್ಯ ಭೂತಗಳಟ್ಟಿ

ಕಿಂಕರರನು ಸಲಹುತಲಿ

ಪಂಕಜಾಕ್ಷನ ಪಾಡಿ ಪೊಗಳುವೆ ಕೊಡಗಿಯ

ಶಂಕರನಾರಾಯಣರ ಪ

ಪಡುವಿನ ಗಡಲಿನ ತಡಿಯಲಿ ವಿಪ್ರನ

ಗಡಣದ ನಡುವೆ ಕಾನನದಿ

ಒಡೆದುಮೂಡಿದ ದೇವರೊಡೆಯನ ಕೊಡಗಿಯ

ಮೃಡನಾರಾಯಣರ ವರ್ಣಿಸುವೆ1

ಕಪ್ಪುರಗೌರನ ಮೇಘಶ್ಯಾಮಳನಾ ಕಂ-

ದರ್ಪನ ವೈರಿಯಪಿತನ

ತಪ್ಪದೆ ನಂದಿ ಗರುಡವಾಹನನಾ-

ಗಿಪ್ಪದೇವನ ಕಂಡೆನಿಂದು 2

ಮಂಜುಳ ಸರ್ಪಾಭರಣನ ಕಂಡೆನು

ಮಂಜುಳ ಹಾರಪದಕನ

ಕುಂಜರ ಚರ್ಮವು ಪೊಂಬಟ್ಟೆವಸನವು

ಕೆಂಜೆಡೆ ಮಕುಟದ ಪ್ರಭೆಯು 3

ಮುರಹರ ಪುರಹರ ಗೌರೀಶಲಕ್ಷ್ಮೀಶ

ಗಿರಿವಾಸ ವೈಕುಂಠವಾಸ

ವರಚಕ್ರ ತ್ರಿಶೂಲಧರ ತ್ರಾಹಿಯೆಂಬ ಮ-

ತ್ರ್ಯರ ಮನ್ನಿಸುವ ಕರುಣದಲಿ 4

ವ್ರತದಿಂದ ನೋಡುವ ಯತಿಗಳ ಸಂದಣಿ

ಕ್ಷಿತಿಯನಾಳುವ ರಾಯರರ್ಥಿ

ಶ್ರುತಿ ಪುರಾಣಗಳರ್ಥಿ ಕೊಡಗಿಯ ದೇವನ

ಮತಿಗೆ ಮಂಗಳವೀವುತಿದಿದಕೊ 5

ರಂಗಪೂಜೆಗಳ ಸಂದಣಿ ಒಂದು ಕಡೆಯಲ್ಲಿ

ಮಂಗಳಾರತಿಯ ಸಂಭ್ರಮವು

ತುಂಗವಿಕ್ರಮನ ಸ್ತುತಿಸಿ ಪಾಡಿ ಪೊಗಳುವ

ಹಿಂಗದೆ ನೋಡುವ ಜನರು 6

ಅಯನದ ಶ್ರೀಬಲಿ ದೀಪದುತ್ಸಹಗಳು

ಭುವನದ ನಡುವೆ ಕಾನನದಿ

ಹಯವದನನೆಂಬ ಕೊಡಗಿಯ ದೇವನ

ನಯದಿ ನರರಿಗೆ ತುತಿಸಲಿನ್ನಳವೆ 7

***