ಬೇಡ ಮನವೆ ಬೇಡಿಕೊಂಬೆನೊ ನಾನು purandara vittala

ರಾಗ ಕಾಂಭೋಜ. ಆದಿ ತಾಳ

ಬೇಡ ಮನವೆ ಬೇಡಿಕೊಂಬೆನೊ ನಾನು
ಕಾಡದಿರು ಕಪಟದಿ ಮನವೆ ||ಪ||

ಮಾಡದಿರು ಮತ್ಸರವ ಪರರಿಗೆ ತನ್ನವರಿಗೆ
ಕೇಡನೆಣಿಸಲು ಬೇಡ ಮನವೆ ||ಅ||

ಸಿಟ್ಟಿನಿಂದೊಬ್ಬರನು ಕೆಟ್ಟನುಡಿಯಲು ಬೇಡ
ನಿಟ್ಟು ಮುನಿವರು ಕೇಳು ಮನವೆ
ಕೊಟ್ಟ ಸಾಲವನು ನೀ ಕೊಡದೆ ಬಾಯ್ಬಡೆದರೆ
ಕಷ್ಟ ತಪ್ಪದು ಕೇಳು ಮನವೆ ||

ಸರಿಯಲ್ಲದವರೊಡನೆ ಸಮನಾಗಿ ಕಾದಿದರೆ
ಹಿರಿಯತನ ಕೆಡುವುದೈ ಮನವೆ
ನೆರೆ ನಂಬಿದವರ ದೊಡ್ಡವರ ಮಾಡಿದರೆ
ಹಿರಿಯತನ ಅದರಿಂದ ಮನವೆ ||

ಚಾಡಿಯನು ಹೇಳಿ ದಂಡವನು ತೆರಿಸಿದಾತಗೆ
ನಾಡೆಲ್ಲ ಹಗೆ ಕೇಳು ಮನವೆ
ಕೂಡಿದ್ದ ಗೆಳೆತನವನಗಲಿಸಿದವನಿಗೆ
ಕೇಡು ತಪ್ಪದು ಕೇಳು ಮನವೆ ||

ಹೆಂಡತಿಯ ಪರರಲ್ಲಿ ಬಿಡುವುದು ಬಹು ಲಜ್ಜೆ
ಭಂಡನೆನುವರು ಕೇಳು ಮನವೆ
ಉಂಡ ಮನೆಗೆರಡನ್ನು ಬಗೆದವನ ಸಂಗ
ಬೇಡೆಂದೆಂದಿಗೂ ಕೇಳು ಮನವೆ ||

ವಂದನೆಯ ಮಾಡಿ ಗುರು ಹರಿಯರ ಪಾದಗಳ
ಕಂಡು ನೀ ಶುಚಿಯಾಗು ಮನವೆ
ತಂದೆ ಪುರಂದರವಿಠಲನ್ನ ಪಾದವ
ಪೊಂದಿ ನೀ ಸುಖಿಯಾಗು ಮನವೆ ||
***

pallavi

bEDa manave bEDikombeno nAnu kADadiru kapaTadi manave

anupallavi

mADadiru matsarava pararige tannavarige kEDaneNisusalu bEDa manave

caraNam 1

siTTi nindobbaranu keTTa nuDiyalu bEDa niTTu munivaru kELu manave

koTTa sAlavanu nI koDade bAi baDidare kaSTa tappadu kELu manave

caraNam 2

siriyalladavaroDana samanAgi kAdidare hariyatana keDuvudai manave nere

nambidavara doDDavara mADidare hariyatanavadarinda manave

caraNam 3

cADiyanu hELi daNDavanu terisidAtage nADella hage kELu manave

kUDidda geLetanavana galisidavanige gEDu tappadu kELu manave

caraNam 4

heNDadiya pararalli biDuvudu bahu lajje bhaNDanenuvaru kELu manave

uNDa manegeraDannu bagedavana sanga bEDendendigU kELu manave

caraNam 5

vandaneya mADi guru hariyara pAdagaLa kaNDu nI shuciyAgu manave

tande purandara viTTalanna pAdava pondi nI sukhiyAgu manave

***