vyasaraja stotram
ವಂದೇ ಮುಕುಂದಮರವಿಂದಭವಾದಿವಂದ್ಯಂ
ಇಂದಿಂದಿರಾವ್ರತತಿಮೇಚಕಮಾಕಟಾಕ್ಷೈಃ |
ಬಂದೀಕೃತಾನನಮಮಂದಮತಿಂ ವಿದಧ್ಯಾತ್
ಆನಂದತೀರ್ಥಹೃದಯಾಂಬುಜಮತ್ತಭೃಂಗಃ ||೧||
ಶ್ರೀವ್ಯಾಸಯೋಗೀ ಹರಿಪಾದರಾಗೀ
ಭಕ್ತಾತಿಪೂಗೀ ಹಿತದಕ್ಷಸದ್ಗೀಃ |
ತ್ಯಾಗೀ ವಿರಾಗೀ ವಿಷಯೇಷು ಭೋಗೀ
ಮುಕ್ತೌ ಸದಾ ಗೀತಸುರೇಂದ್ರಸಂಗೀ ||೨||
ಲಕ್ಷ್ಮೀಶಪಾದಾಂಬುಜಮತ್ತಭೃಂಗ:
ಸದಾ ದಶಪ್ರಜ್ಞನಯಪ್ರಸಂಗ: |
ಅದ್ವೈತವಾದೇ ಕೃತಮೂಲಭಂಗೋ
ಮಹಾವ್ರತೀಶೋ ವಿಷಯೇಷ್ವಸಂಗ: ||೩||
ಸದಾ ಸದಾಯತ್ತಮಹಾನುಭಾವೋ
ಭಕ್ತಾಘತೂಲೋಚ್ಚಯತೀವ್ರದಾವ: |
ದೌರ್ಜನ್ಯವಿಧ್ವಂಸನದಕ್ಷರಾವ:
ಶಿಷ್ಯೇಷು ಯೋ ಯಚ್ಛತಿ ದಿವ್ಯಗಾವ: ||೪||
ಅದ್ವೈತದಾವಾನಲಕಾಲಮೇಘೋ
ರಮಾರಮಸ್ನೇಹವಿದಾರಿತಾಘ: |
ವಾಗ್ವೈಖರೀನಿರ್ಜಿತಸಂಶಯೌಘೋ
ಮಾಯಾಮತವ್ರಾತಹಿಮೇ ನಿದಾಘ: ||೫||
ಮಧ್ವಸಿದ್ಧಾಂತದುಗ್ಧಾಬ್ಧಿವೃದ್ಧಿಪೂರ್ಣಕಲಾಧರ: |
ವ್ಯಾಸರಾಜಯತೀಂದ್ರೋ ಮೇ ಭೂಯಾದೀಪ್ಸಿತಸಿದ್ಧಯೇ ||೬||
ಯನ್ನಾಮಗ್ರಹಣಾದೇವ ಪಾಪರಾಶಿ: ಪಲಾಯತೇ |
ಸೋಽಯಂ ಶ್ರೀವ್ಯಾಸಯೋಗೀಂದ್ರೋ ನಿಹಂತು ದುರಿತಾನಿ ನ: ||೭||
ಯನ್ಮೃತ್ತಿಕಾದರ್ಶನಮಾತ್ರಭೀತ:
ಕ್ವಚಿತ್ ಪಿಶಾಚಸ್ತದನುವ್ರತೇಭ್ಯ: |
ದತ್ವಾ ಧನಂ ವಾಂಛಿತಮಾಪ ತಸ್ಯ
ತೈರ್ಮಾರ್ಜಿತಾಯಾಮಚಿರೇಣ ಮುಕ್ತಿಂ ||೮||
ಯತ್ಕಾಶಿನಾಸಿಕಾಮುಕ್ತಜಲಾಕ್ತಶ್ಚಕಿತಾಂತರ: |
ವ್ಯಾಘ್ರೋ ಮಹಾನಪಿ ಸ್ಪ್ರಷ್ಟುಂ ನಾಶಕತ್ ತಮಿಹಾಶ್ರಯೇ ||೯||
ದ್ವಾತ್ರಿಂಶತ್ಸಪ್ತಶತಕಮೂರ್ತೀರ್ಹನೂಮತ: ಪ್ರಭೋ: |
ಪ್ರತಿಷ್ಠಾತಾ ಸ್ಮೃತಿಖ್ಯಾತಸ್ತಂ ಭಜೇ ವ್ಯಾಸಯೋಗಿನಂ ||೧೦||
ಸೀಮಾನಂ ತತ್ರ ತತ್ರೈತ್ಯ ಕ್ಷೇತ್ರೇಷು ಚ ಮಹಾಮತಿ: |
ವ್ಯವಸ್ಥಾಪ್ಯಾತ್ರ ಮರ್ಯಾದಾಂ ಲಬ್ಧವಾಂಸ್ತಮಿಹಾಶ್ರಯೇ ||೧೧||
ಮಧ್ವದೇಶಿಕಸಿದ್ಧಾಂತಪ್ರವರ್ತಕಶಿರೋಮಣಿ: |
ಸೋಽಯಂ ಶ್ರೀವ್ಯಾಸಯೋಗೀಂದ್ರೋ ಭೂಯಾದೀಪ್ಸಿತಸಿದ್ಧಯೇ ||೧೨||
ಭೂತಪ್ರೇತಪಿಶಾಚಾದ್ಯಾ ಯಸ್ಯ ಸ್ಮರಣಮಾತ್ರತ: |
ಪಲಾಯಂತೇ ಶ್ರೀನೃಸಿಂಹಸ್ಥಾನಂ ತಮಹಮಾಶ್ರಯೇ ||೧೩||
ವಾತಜ್ವರಾದಿರೋಗಾಶ್ಚ ಭಕ್ತ್ಯಾ ಯಮುಪಸೇವತ: |
ದೃಢವ್ರತಸ್ಯ ನಶ್ಯಂತಿ ಪಿಶಾಚಾಶ್ಚ ತಮಾಶ್ರಯೇ ||೧೪||
ತಾರಪೂರ್ವಂ ಬಿಂದುಯುಕ್ತಂ ಪ್ರಥಮಾಕ್ಷರಪೂರ್ವಕಂ |
ಚತುರ್ಥ್ಯಂತಂ ಚ ತನ್ನಾಮ ನಮ:ಶಬ್ದವಿಭೂಷಿತಂ ||೧೫||
ಪಾಠಯಂತಂ ಮಾಧ್ವನಯಂ ಮೇಘಗಂಭೀರಯಾ ಗಿರಾ |
ಧ್ಯಾಯನ್ನಾವರ್ತಯೇದ್ಯಸ್ತು ಭಕ್ತ್ಯಾ ಮೇಧಾಂ ಸ ವಿಂದತಿ ||೧೬||
ರತ್ನಸಿಂಹಾಸನಾರೂಢಂ ಚಾಮರೈರಭಿವೀಜತಂ |
ಧ್ಯಾಯನ್ನಾವರ್ತಯೇದ್ಯಸ್ತು ಮಹತೀಂ ಶ್ರಿಯಮಾಪ್ನುಯಾತ್ ||೧೭||
ಪ್ರಹ್ಲಾದಸ್ಯಾವತಾರೋಽಸಾವಹೀಂದ್ರಾನುಪ್ರವೇಶವಾನ್ |
ತೇನ ತತ್ಸೇವಿನಾಂ ನೄಣಾಂ ಸರ್ವಮೇತದ್ ಭವೇದ್ ಧ್ರುವಂ ||೧೮||
ನಮೋ ವ್ಯಾಸಮುನೀಂದ್ರಾಯ ಭಕ್ತಾಭೀಷ್ಟಪ್ರದಾಯಿನೇ |
ನಮತಾಂ ಕಲ್ಪತರವೇ ಭಜತಾಂ ಕಾಮಧೇನವೇ ||೧೯||
ವ್ಯಾಸರಾಜಗುರೋ ಮಹ್ಯಂ ತ್ವತ್ಪದಾಂಬುಜಸೇವನಾತ್ |
ದುರಿತಾನಿ ವಿನಶ್ಯಂತು ಯಚ್ಛ ಶೀಘ್ರಂ ಮನೋರಥಾನ್ ||೨೦||
ಯೋ ವ್ಯಾಸತ್ರಯಸಂಜ್ಞಕಾನ್ ದೃಢತರಾನ್ ಮಧ್ವಾರ್ಯಶಾಸ್ತ್ರಾರ್ಥಕಾನ್ |
ರಕ್ಷದ್ವಜ್ರಶಿಲಾಕೃತೀನ್ ಬಹುಮತಾನ್ ಕೃತ್ವಾ ಪರೈರ್ದುಸ್ತರಾನ್ ||೨೧||
ಪ್ರಾಯಚ್ಛನ್ನಿಜಪಾದಯುಗ್ಮಸರಸೀಜಾಸಕ್ತನೄಣಾಂ ಮುದಾ |
ಸೋಽಯಂ ವ್ಯಾಸಮುನೀಶ್ವರೋ ಮಮ ಭವೇತ್ ತಾಪತ್ರಯಕ್ಷಾಂತಯೇ ||೨೨||
ಮಧ್ವಭಕ್ತೋ ವ್ಯಾಸಶಿಷ್ಯಪೂರ್ಣಪ್ರಜ್ಞಮತಾನುಗ: |
ವ್ಯಾಸರಾಜಮುನಿಶ್ರೇಷ್ಠ: ಪಾತು ನ: ಕೃಪಯಾ ಗುರು: ||೨೩||
ವ್ಯಾಸರಾಜ ವ್ಯಾಸರಾಜ ಇತಿ ಭಕ್ತ್ಯಾ ಸದಾ ಜಪನ್ |
ಮುಚ್ಯತೇ ಸರ್ವದು:ಖೇಭ್ಯಸ್ತದಂತರ್ಯಾಮಿಣೋ ಬಲಾತ್ ||೨೪||
ಸ್ತುವನ್ನನೇನ ಮಂತ್ರೇಣ ವ್ಯಾಸರಾಜಾಯ ಧೀಮತೇ |
ಅಭಿಷೇಕಾರ್ಚನಾದೀನ್ ಯ: ಕುರುತೇ ಸ ಹಿ ಮುಕ್ತಿಭಾಕ್ ||೨೫||
ಗುರುಭಕ್ತ್ಯಾ ಭವೇದ್ವಿಷ್ಣುಭಕ್ತಿರವ್ಯಭಿಚಾರಿಣೀ |
ತಯಾ ಸರ್ವಂ ಲಭೇದ್ಧೀಮಾಂಸ್ತಸ್ಮಾದೇತತ್ ಸದಾ ಪಠೇತ್ ||೨೬||
|| ಇತಿ ಶ್ರೀವಿಜಯೀಂದ್ರತೀರ್ಥವಿರಚಿತಂ ಶ್ರೀವ್ಯಾಸರಾಜಸ್ತೋತ್ರಂ ||
*********
अथ श्री व्यासराज स्तोत्रं
वंदे मुकुंदमरविंदभवादिवंद्यं
इंदिंदिराव्रततिमेचकमाकटाक्षैः ।
बंदीकृताननममंदमतिं विदध्यात्
आनंदतीर्थहृदयांबुजमत्तभृंगः ॥ १॥
श्रीव्यासयोगी हरिपादरागी
भक्तातिपूगी हितदक्षसद्गीः ।
त्यागी विरागी विषयेषु भोगी
मुक्तौ सदा गीतसुरेंद्रसंगी ॥ २॥
लक्ष्मीशपादांबुजमत्तभृंग:
सदा दशप्रज्ञनयप्रसंग: ।
अद्वैतवादे कृतमूलभंगो
महाव्रतीशो विषयेष्वसंग: ॥ ३॥
सदा सदायत्तमहानुभावो
भक्ताघतूलोच्चयतीव्रदाव: ।
दौर्जन्यविध्वंसनदक्षराव:
शिष्येषु यो यच्छति दिव्यगाव: ॥ ४॥
अद्वैतदावानलकालमेघो
रमारमस्नेहविदारिताघ: ।
वाग्वैखरीनिर्जितसंशयौघो
मायामतव्रातहिमे निदाघ: ॥ ५॥
मध्वसिद्धांतदुग्धाब्धिवृद्धिपूर्णकलाधर: ।
व्यासराजयतींद्रो मे भूयादीप्सितसिद्धये ॥ ६॥
यन्नामग्रहणादेव पापराशि: पलायते ।
सोऽयं श्रीव्यासयोगींद्रो निहंतु दुरितानि न: ॥ ७॥
यन्मृत्तिकादर्शनमात्रभीत:
क्वचित् पिशाचस्तदनुव्रतेभ्य: ।
दत्वा धनं वांछितमाप तस्य
तैर्मार्जितायामचिरेण मुक्तिं ॥ ८॥
यत्काशिनासिकामुक्तजलाक्तश्चकितांतर: ।
व्याघ्रो महानपि स्प्रष्टुं नाशकत् तमिहाश्रये ॥ ९॥
द्वात्रिंशत्सप्तशतकमूर्तीर्हनूमत: प्रभो: ।
प्रतिष्ठाता स्मृतिख्यातस्तं भजे व्यासयोगिनं ॥ १०॥
सीमानं तत्र तत्रैत्य क्षेत्रेषु च महामति: ।
व्यवस्थाप्यात्र मर्यादां लब्धवांस्तमिहाश्रये ॥ ११॥
मध्वदेशिकसिद्धांतप्रवर्तकशिरोमणि: ।
सोऽयं श्रीव्यासयोगींद्रो भूयादीप्सितसिद्धये ॥ १२॥
भूतप्रेतपिशाचाद्या यस्य स्मरणमात्रत: ।
पलायंते श्रीनृसिंहस्थानं तमहमाश्रये ॥ १३॥
वातज्वरादिरोगाश्च भक्त्या यमुपसेवत: ।
दृढव्रतस्य नश्यंति पिशाचाश्च तमाश्रये ॥ १४॥
तारपूर्वं बिंदुयुक्तं प्रथमाक्षरपूर्वकं ।
चतुर्थ्यंतं च तन्नाम नम:शब्दविभूषितं ॥ १५॥
पाठयंतं माध्वनयं मेघगंभीरया गिरा ।
ध्यायन्नावर्तयेद्यस्तु भक्त्या मेधां स विंदति ॥ १६॥
रत्नसिंहासनारूढं चामरैरभिवीजतं ।
ध्यायन्नावर्तयेद्यस्तु महतीं श्रियमाप्नुयात् ॥ १७॥
प्रह्लादस्यावतारोऽसावहींद्रानुप्रवेशवान् ।
तेन तत्सेविनां नॄणां सर्वमेतद् भवेद् ध्रुवं ॥ १८॥
नमो व्यासमुनींद्राय भक्ताभीष्टप्रदायिने ।
नमतां कल्पतरवे भजतां कामधेनवे ॥ १९॥
व्यासराजगुरो मह्यं त्वत्पदांबुजसेवनात् ।
दुरितानि विनश्यंतु यच्छ शीघ्रं मनोरथान् ॥ २०॥
यो व्यासत्रयसंज्ञकान् दृढतरान् मध्वार्यशास्त्रार्थकान् ।
रक्षद्वज्रशिलाकृतीन् बहुमतान् कृत्वा परैर्दुस्तरान् ॥ २१॥
प्रायच्छन्निजपादयुग्मसरसीजासक्तनॄणां मुदा ।
सोऽयं व्यासमुनीश्वरो मम भवेत् तापत्रयक्षांतये ॥ २२॥
मध्वभक्तो व्यासशिष्यपूर्णप्रज्ञमतानुग: ।
व्यासराजमुनिश्रेष्ठ: पातु न: कृपया गुरु: ॥ २३॥
व्यासराज व्यासराज इति भक्त्या सदा जपन् ।
मुच्यते सर्वदु:खेभ्यस्तदंतर्यामिणो बलात् ॥ २४॥
स्तुवन्ननेन मंत्रेण व्यासराजाय धीमते ।
अभिषेकार्चनादीन् य: कुरुते स हि मुक्तिभाक् ॥ २५॥
गुरुभक्त्या भवेद्विष्णुभक्तिरव्यभिचारिणी ।
तया सर्वं लभेद्धीमांस्तस्मादेतत् सदा पठेत् ॥ २६॥
॥ इति श्रीविजयींद्रतीर्थविरचितं श्रीव्यासराजस्तोत्रं ॥
*******
No comments:
Post a Comment